'കര്‍മ എന്നൊന്നുണ്ട് മോനേ...'; പക വീട്ടി ടൊവിനോ; ബേസിലിനെ ട്രോളി സഞ്ജു

സോഷ്യല്‍ മീഡിയയില്‍ ഇപ്പോള്‍ താരം ബേസില്‍ ജോസഫാണ്. കഴിഞ്ഞ ദിവസം കോഴിക്കോട് ഇഎംഎസ് കോര്‍പ്പറേഷന്‍ സ്റ്റേഡിയത്തിലെ സൂപ്പര്‍ ലീഗ് കേരളയുടെ ഫൈനൽ വേദിയില്‍ വച്ച് താരത്തിന് പറ്റിയ അബദ്ധത്തിന്‍റെ ദൃശ്യങ്ങള്‍ വൈറലാണ്. 

കാലിക്കറ്റ് എഫ്സി - ഫോഴ്‌സ കൊച്ചി മത്സരം കാണുന്നതിന് ഫോഴ്സ  കൊച്ചിയുടെ ഉടമസ്ഥനായ പൃഥ്വിരാജും കാലിക്കറ്റ് എഫ്‌സിയുടെ ഉടമസ്ഥനായ ബേസില്‍ ജോസഫും എത്തിയിരുന്നു. സമ്മാനദാന ചടങ്ങിനിടെ ഒരു കളിക്കാരന് ബേസില്‍ കൈ കൊടുക്കാന്‍ നീട്ടിയപ്പോള്‍ അത് കാണാതെ  താരം പൃഥ്വിരാജിന് കൈ കൊടുക്കുകയായിരുന്നു . ഈ വീഡിയോയിപ്പോള്‍  സമൂഹ മാധ്യമങ്ങളിൽ വൈറലാണ്.

വിഡിയോ വൈറലായതോടെ ഇത് കര്‍മ ഫലം തന്നെയെന്ന് പറയുകയാണ് സോഷ്യല്‍ മിഡിയ. നേരത്തെ മരണമാസ് എന്ന സിനിമയുടെ പൂജക്കിടെ പൂജാരി ആരതി നല്‍കിയപ്പോള്‍ കൈ നീട്ടിയ ടൊവിനോയെ കാണാതെ പൂജാരി പോയിരുന്നു. അത് കണ്ട ബേസിൽ ടൊവിനോയെ നോക്കി പൊട്ടിച്ചിരിക്കുന്ന വീഡിയോ വൈറലായിരുന്നു. പിന്നീട് പല അഭിമുഖങ്ങളിലും ഇത് പറഞ്ഞ് ബേസില്‍ ടൊവിനോയെ കളിയാക്കുകയും ചെയ്​തിരുന്നു. ഈ സംഭവത്തോട് ബന്ധിപ്പിച്ചാണ് പലരും ബേസിലും ട്രോളുന്നത്. 

ക്രിക്കറ്റ് താരവും ബേസിലിന്‍റെ അടുത്ത സുഹൃത്തുമായ സഞ്ജു സാംസണ്‍ വിഡിയോ സമൂഹമാധ്യമങ്ങളില്‍ പങ്കുവച്ചിരുന്നു. ചിരിക്കുന്ന ഇമോജിയാണ് ടൊവിനോ വിഡിയോക്ക് കമന്‍റായി നല്‍കിയത്. 'നീ പക പോക്കുവാണല്ലേടാ' എന്ന് ബേസിലും കമന്‍റ് ചെയ്​തു. 'കര്‍മ ഈസ് എ ബിച്ച്' എന്നാണ് ടൊവിനോ ഇതിനു മറുപടി നല്‍കിയത്. എന്തായാലും ബേസിലിനെ ട്രോളന്മാര്‍ ഏറ്റെടുത്തിരിക്കുകയാണ്. താരത്തെ ട്രോളി നിരവധി വിഡിയോകളും മീമുകളുമാണ് പ്രചരിക്കുന്നത്.