മോളിവുഡ് ഏറെ പ്രതീക്ഷയോടെ കാത്തിരിക്കുന്ന ഒരു കോമ്പോയാണ് മമ്മൂട്ടിയും ദുല്‍ഖറും. ദുല്‍ഖര്‍ തന്നെ ഇതിനായി പരസ്യമായി ആഗ്രഹം പ്രകടിപ്പിച്ചിട്ടുണ്ടെങ്കിലും മമ്മൂട്ടി വഴങ്ങുന്ന ലക്ഷണമൊന്നും കാണുന്നില്ല. ഇരുവരേയും ഒന്നിച്ചൊരു സിനിമയില്‍ കാണാന്‍ കിട്ടാത്ത പ്രേക്ഷകര്‍ക്കായി ഒരു കിടിലന്‍ സര്‍പ്രൈസ് ലഭിച്ചിരിക്കുകയാണ്.
ദുല്‍ഖറും മമ്മൂട്ടിയും ഒന്നിച്ചുള്ള എഐ വിഡിയോ ആണ് സോഷ്യല്‍ മീഡിയയില്‍ ഇപ്പോള്‍ പ്രചരിക്കുന്നത്. ദുല്‍ഖറിന്‍റെ കുട്ടിക്കാലത്തെ ചിത്രങ്ങള്‍ ചലിപ്പിച്ചാണ് ഈ എഐ വിഡിയോ നിര്‍മിച്ചിരിക്കുന്നത്. 'മമ്മൂട്ടിയെ കാണാന്‍ ദുല്‍ഖറിനെ സഹോദരനെ പോലെയുണ്ടെ'ന്ന് രമേശ് പിഷാരടി പറയുമ്പോള്‍ 'ഓ... ദുല്‍ഖര്‍ കേള്‍ക്കണ്ട' എന്ന മമ്മൂട്ടിയുടെ മറുപടിയിലാണ് വിഡിയോ തുടങ്ങുന്നത്. പിന്നെ ഭീഷ്മപര്‍വ്വത്തിലെ മാസ് ബിജിഎമ്മിന്‍റെ അകമ്പടിയോടെയാണ് വിഡിയോ പുരോഗമിക്കുന്നത്.
ലിബിന്‍ ബാഹുലേയന്‍ എന്ന പ്രൊഫൈലില്‍ വന്ന വിഡിയോ നിര്‍മാതാവ് എന്‍.എം.ബാദുഷ പങ്കുവച്ചതോടെ വലിയ പ്രചാരമാണ് ലഭിക്കുന്നത്. ഒന്നിച്ചൊരു സിനിമയോ ലഭിക്കുന്നില്ല, ഇനി എഐ എങ്കില്‍ എഐ എന്ന് പറഞ്ഞ് സമാധാനിക്കുകയാണ് ആരാധകര്‍.
ലക്കി ഭാസ്കറാണ് ഒടുവില്‍ തിയേറ്ററുകളില്‍ എത്തി ദുല്‍ഖര്‍ ചിത്രം. വെങ്കി അറ്റ്ലൂരി സംവിധാനം ചെയ്ത ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നത്. ടര്‍ബോയാണ് ഒടുവില്‍ റിലീസ് ചെയ്ത മമ്മൂട്ടി ചിത്രം. എം.ടി.വാസുദേവന്‍ നായരുടെ കഥകളെ ആസ്പദമാക്കി ഒരുക്കിയ മനോരഥങ്ങള്‍ എന്ന ആന്തോളജിയിലെ കടുഗന്നാവ ഒരു യാത്ര എന്ന സെഗ്മെന്‍റിലും മമ്മൂട്ടി എത്തിയിരുന്നു.