ഐശ്വര്യയുടെ മമ്മി പ്രേതമോ? രോമാഞ്ചത്തിനുശേഷം അടുത്ത ഹൊറര്‍ കോമഡി

ഐശ്വര്യ ലക്ഷ്​മി, ഷറഫുദ്ധീൻ എന്നിവര്‍ കേന്ദ്രകഥാപാത്രങ്ങളാവുന്ന ഹലോ മമ്മിയുടെ ട്രെയിലര്‍ പുറത്ത്. രസകരമായ മുഹൂര്‍ത്തങ്ങളിലൂടെ കടന്നുപോകുന്ന ട്രെയിലര്‍ ഒരു ഹൊറര്‍ കോമഡി ചിത്രമാണെന്ന സൂചനയാണ് നല്‍കുന്നത്. ഒരു കല്യാണ ആലോചനയും പെണ്ണിന്‍റെ മരിച്ചുപോയ അമ്മ പ്രേതമായി ഇപ്പോഴും ചുറ്റുവട്ടത്തുണ്ടെന്ന് ചെറുക്കന്‍ അറിയുന്നതും തുടര്‍ന്നുവരുന്ന പ്രശ്​നങ്ങളുമാണ് ട്രെയിലറില്‍ കാണിക്കുന്നത്. 

നവാഗതനായ വൈശാഖ് എലൻസാണ് ചിത്രം സംവിധാനം ചെയ്യുന്നത്. നവംബർ 21 ന് ചിത്രം തിയേറ്ററിലെത്തും. ഷറഫുദ്ധീനും ഐശ്വര്യ ലക്ഷ്മിയും നായകനും നായികയുമായി എത്തുന്ന ആദ്യ സിനിമയെന്ന പ്രത്യേകതയും ഹലോ മമ്മിക്കുണ്ട്. മുമ്പ് ഐശ്വര്യ നായികയായ വരത്തനില്‍ വില്ലനായി ഷറഫുദ്ധീന്‍ എത്തിയിരുന്നു. 

അജു വർഗീസ്, ജഗദീഷ്, ജോണി ആന്റണി, ജോമോൻ ജ്യോതിർ, ബിന്ദു പണിക്കർ, അദ്രി ജോ, ശ്രുതി സുരേഷ്, ഗംഗാ മീരാ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. ഹാങ്ങ് ഓവർ ഫിലിംസും എ ആൻഡ് എച്ച് എസ് പ്രൊഡക്ഷനും ചേർന്നാണ് ചിത്രം നിർമ്മിക്കുന്നത്.