തിയറ്ററിലെ അണ്ണന്‍മാര്‍ക്ക് പുതിയ എതിരാളി; ഇത് ‘കങ്കുവ അണ്ണന്‍’

കറുത്ത വസ്ത്രം, കൈയ്യില്‍ ഒരു വാള്‍, മുഖത്ത് ചായം തേച്ചിരിക്കുന്നു, കൊച്ചിയിലെ തിയറ്ററിലൂടെ അലറി വിളിച്ച് നടക്കുന്ന യുവാവിനെ കണ്ട പ്രേക്ഷകര്‍ ഒന്ന് ഞെട്ടി, സൂര്യയുടെ കങ്കുവ സിനിമ കാണാന്‍ കങ്കുവ വേഷത്തിലെത്തിയിരിക്കുന്ന പുതിയ താരമാണ്  ‘കങ്കുവ അണ്ണന്‍’ . സൂര്യയുടെ ഡയലോഗുകള്‍ പറഞ്ഞ് തിയറ്ററിലൂടെ അലറി വിളിച്ച് നടക്കുകയായിരുന്നു ഇയാള്‍. സിനിമയ്ക്ക് വന്നവര്‍ കൗതുകത്തോടെ ഇയാളെ നോക്കുകയും ചെയ്യുന്നുണ്ട്. 

അതേ സമയം ചിത്രത്തിന് സമ്മിശ്ര പ്രതികരണമാണ് സൂര്യ ചിത്രത്തിന് ലഭിക്കുന്നത്. കഥ ദൈര്‍ഘ്യമുള്ളതാണെങ്കിലും ഇഷ്‍ടം തോന്നുന്നതാണെന്ന് ചിത്രം കണ്ടവര്‍ അഭിപ്രായപ്പെടുന്നുണ്ട്. തരക്കേടില്ലാത്ത പടമാണെന്ന് പറയുന്നവരുമുണ്ട്. രണ്ട് വർഷത്തെ കാത്തിരിപ്പിനു ശേഷം വന്ന സിനിമയായതിനാൽ പ്രതീക്ഷയ്ക്കൊത്ത് വന്നില്ലെന്ന് പറയുന്നവരുമുണ്ട്. സൂര്യയുടെ പെർഫോമൻസിനെപ്പറ്റി ആരാധകർക്കിടയിൽ നല്ല അഭിപ്രായമാണ്.

സ്റ്റുഡിയോ ഗ്രീനിന്‍റെ ബാനറിൽ കെ ഇ ജ്ഞാനവേൽ രാജ, യു വി ക്രിയേഷൻസിന്റെ ബാനറിൽ വംശി പ്രമോദ് എന്നിവർ ചേർന്നാണ് ചിത്രം നിർമ്മിക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം കേരളത്തിലെത്തിക്കുന്നത്. കങ്കുവ, ഫ്രാൻസിസ് എന്നിങ്ങനെ ഇരട്ടവേഷങ്ങളിൽ സൂര്യ എത്തുന്ന ചിത്രത്തിൽ ബോളിവുഡ് നടി ദിഷ പഠാണിയാണ് നായികാ വേഷം ചെയ്യുന്നത്.