സാമന്തയല്ല, സോഷ്യൽമീഡിയയിൽ ഫയറായി ശ്രീലീല; പുഷ്പ 2 വിലെ ​ഗാനം പുറത്ത്

സിനിമാ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് അല്ലു അർജുൻ നായകാനായെത്തുന്ന 'പുഷ്പ 2'. ചിത്രത്തിന്റെ ഓരോ അപ്ഡേറ്റുകൾക്കും വൻ സ്വീകാര്യതയാണ് ലഭിച്ചുക്കൊണ്ടിരിക്കുന്നത്. ഇപ്പോഴിതാ, ‘പുഷ്പ 2’ലെ ‘കിസിക്’ എന്നു പേരിട്ടിരിക്കുന്ന പാട്ട് പുറത്തിറക്കിയിരിക്കുകയാണ് അണിയറപ്രവർത്തകർ. പാട്ടിന്റെ ലിറിക്കൽ വിഡിയോ ആണ് പുറത്തിറക്കിയത്. 

തെലുങ്കിലെ ഡാൻസിങ് ക്വീൻ ശ്രീലീല തകർത്താടിയ ​ഗാനം, പുറത്തിറങ്ങി മണിക്കൂറുകൾക്കകം യുട്യൂബിൽ തരം​ഗമായി മാറിയിരിക്കുകയാണ്. രണ്ടുകോടിയിലധികം ആളുകളാണ് ഇതുവരെ ​ഗാനം കേട്ടിരിക്കുന്നത്. ​മികച്ച പ്രതികരണങ്ങളോടെ ​ഗാനം യുട്യൂബ് ട്രെൻഡിങ് ലിസ്റ്റിൽ ഇടം പിടിക്കുമ്പോൾ സാമന്തയുടെ പ്രകടനമാണോ ശ്രീലീലയുടെ പ്രകടനമാണോ മികച്ചതെന്ന ചർച്ചയും സോഷ്യലിടത്ത് ചർച്ചയാകുന്നു. 

ദേവി ശ്രീ പ്രസാദ് ആണ് കിസിക്കിന് ഈണമൊരുക്കിയത്. സുഭലഷിണിയാണ് ഗാനം ആലപിച്ചിരിക്കുന്നത്.  ചന്ദ്രബോസിന്റേതാണു വരികൾ. വിഡിയോ പതിപ്പിനു വേണ്ടി കാത്തിരിക്കുകയാണ് ആരാധകർ. ഏതാനും ദിവസങ്ങൾക്കു മുൻപ് പുറത്തിറങ്ങിയ പാട്ടിന്റെ പ്രൊമോ വിഡിയോ അരക്കോടിക്കടുത്ത് പ്രേക്ഷകരെ സ്വന്തമാക്കിയിരുന്നു.

‘പുഷ്പ’യിലെ ഹോട്ട് നമ്പറിനായി  3 കോടിയാണ് ശ്രീലീല പ്രതിഫലമായി വാങ്ങുന്നത്. ‘പുഷ്പ’ ഒന്നാം ഭാഗത്തിൽ നടി സമാന്തയാണ് ഐറ്റം ഡാൻസുമായി എത്തിയത്. ‘ഊ അന്തവാ...’ എന്ന ഹോട്ട് നമ്പറിനു വേണ്ടി നടി 5 കോടി രൂപ പ്രതിഫലം വാങ്ങിയത് അന്ന് വലിയ ചർച്ചകൾക്ക് വഴിവച്ചിരുന്നു.