വിവാഹദിനം അറിയിച്ച് കാളിദാസ് ജയറാം. വിവാഹത്തിന് ഇനി പത്തു ദിവസം കൂടിയേ ബാക്കിയുള്ളു എന്ന് താരം തന്റെ ഇന്‍സ്റ്റഗ്രാം പേജില്‍ കുറിച്ചു. പ്രതിശ്രുത വധുവും കൂട്ടുകാരിയുമായ താരിണിയുമൊത്തുള്ള ചിത്രം പങ്കുവച്ചാണ് കാളിദാസ് സന്തോഷം അറിയിച്ചത്. ആരാധകർ ഏറെ ആകാംക്ഷയോടെ കാത്തിരിക്കുന്ന താരവിവാഹമാണ് കാളിദാസിന്റേത്.
കാളിദാസിനും താരിണിക്കും ആശംസകളുമായി താരങ്ങളടക്കം നിരവധി പേരെത്തി. നടൻ സത്യരാജിന്റെ മകൾ ദിവ്യ സത്യരാജ് 'എന്റെ പ്രിയപ്പെട്ട ജോഡി' എന്നാണ് കാളിദാസിനെയും താരിണിയെയും വിശേഷിപ്പിച്ചത്. ചുവന്ന ഹൃദയങ്ങൾ പങ്കുവച്ചാണ് നടി മഞ്ജിമ മോഹൻ സ്നേഹം അറിയിച്ചത്.
രണ്ടു വർഷം മുൻപാണ് താരിണിയുമായുളള പ്രണയം സമൂഹമാധ്യമങ്ങളിലൂടെ കാളിദാസ് വെളിപ്പെടുത്തിയത്. നീലഗിരി സ്വദേശിയാണ് ഇരുപത്തിനാലുകാരിയായ താരിണി.