വന്‍മരങ്ങള്‍ക്കിടയിലെന്ന് ടൊവിനോ; ചിരിപ്പിച്ച് ബേസിലിന്‍റെ കമന്‍റ്; എയറിലേക്ക്

പ്രേക്ഷകര്‍ ഏറെ നാളായി കാത്തിരുന്നു എമ്പുരാന്‍റെ ടീസര്‍ കഴിഞ്ഞ ദിവസമാണ് റിലീസ് ചെയ്​തത്. പൃഥ്വിരാജ് ആദ്യമായി സംവിധായകനായ ലൂസിഫറിന്‍റെ രണ്ടാം ഭാഗമായതുകൊണ്ട് തന്നെ ചിത്രത്തിന് വന്‍ഹൈപ്പാണ് ലഭിക്കുന്നത്. മോഹന്‍ലാലിന്‍റെ സ്റ്റീഫന്‍ നെടുമ്പള്ളി അത്രക്കും വലിയ തരംഗമാണ് കേരളത്തില്‍ സൃഷ്​ടിച്ചത്. 

മലയാളത്തിലെ പ്രമുഖതാരങ്ങളെ ക്ഷണിച്ച് വലിയ ഇവന്‍റായാണ് എമ്പുരാന്‍ ടീസര്‍ റിലീസ് ചെയ്​തത്. മമ്മൂട്ടിയാണ് ചിത്രത്തിന്‍റെ ടീസര്‍ റിലീസ് ചെയ്​തത്. സംവിധായകരായ ഷാജി കൈലാസ്, ജോഷി, മഞ്ജു വാര്യര്‍, ടൊവിനോ തോമസ്, സാനിയ അയ്യപ്പന്‍, അനൂപ് മേനോന്‍, ബേസില്‍ ജോസഫ് തുടങ്ങി നിരവധി പേരാണ് ചടങ്ങിനെത്തിയത്. 

ചടങ്ങില്‍ വച്ചെടുത്ത ഒരു ചിത്രം ടൊവിനോ തോമസ് പോസ്റ്റ് ചെയ്​തത് സോഷ്യല്‍ മീഡിയയില്‍ വലിയ ചിരി ഉയര്‍ത്തുകയാണ്. മോഹന്‍ലാലിനും മമ്മൂട്ടിക്കും പിന്നിലായി ഇരുന്ന ടൊവിനോയും ബേസിലും ഇരുവര്‍ക്കും ഇടയില്‍ വരുന്നതു പോലെ എടുത്ത ചിത്രമാണ് താരം പങ്കുവച്ചത്. 'വന്‍മരങ്ങള്‍ക്കിടയില്‍' എന്നാണ് ടൊവിനോ ഫോട്ടോയ്​ക്ക് ക്യാപ്​ഷന്‍ നല്‍കിയിരുന്നത്. ഉടനടി മറുപടി കമന്‍റുമായി ബേസിലുമെത്തി. 'മുട്ട പഫ്​സിലെ മുട്ട' എന്നാണ് ബേസിലിന്‍റെ കമന്‍റ്. 

പിന്നാലെ രസകരമായ കമന്‍റുകളുമായി ആരാധകരുമെത്തി. രണ്ടു പേരും ഇനി സ്വയം എയറിലേക്ക് പോവുകയാണോ എന്നാണ് സോഷ്യല്‍ മീഡിയ ചോദിക്കുന്നത്. 'അടുത്ത യൂണിവേഴ്​സ് തുടങ്ങാനുള്ള പരുപാടി ആണോ' എന്നായിരുന്നു ഒരു കമന്‍റ്. 'ഭാവി വന്മരങ്ങളെന്നും' 'ഇടവിള കൃഷി ആണോ' എന്നുമൊക്കെ കമന്‍റ് എത്തി. എന്തായാലും പുതിയ ഫോട്ടോയും സോഷ്യല്‍ ലോകം ഏറ്റെടുത്തു.