'സെയ്​ഫ് അലി ഖാനെ കുത്തിയവര്‍ക്ക് ശിക്ഷയായി മകന്‍റെ സിനിമ കാണിക്കണം'; പരിഹസിച്ച് കൊമേഡിയന്‍

സെയ്​ഫ് അലി ഖാന്‍റെ മകനായ ഇബ്രാഹിം അലി ഖാന്‍ നായകനായ 'നാദാനിയാൻ' റിലീസിന് പിന്നാലെ വലിയ വിമര്‍ശനങ്ങളാണ് ചിത്രത്തിന് നേരെ വരുന്നത്. നെറ്റ്ഫ്ലിക്സിൽ റിലീസ് ചെയ്​ത ചിത്രത്തില്‍ അന്തരിച്ച നടി ശ്രീദേവിയുടേയും ബോണി കപൂറിന്‍റേയും മകളായ ഖുഷി കപൂറാണ് നായികയായത്. കടുത്ത വിമര്‍ശനങ്ങളും ട്രോളുകളാണ് ഇരുവരുടേയും അഭിനയത്തിന് ലഭിക്കുന്നത്. നെപ്പോ കിഡ്​സായതുകൊണ്ടാണ് ഇരുവര്‍ക്കും അവസരങ്ങള്‍ ലഭിക്കുന്നതെന്നും വിമര്‍ശനമുയര്‍ന്നു.

ഇതിനിടെ സ്​റ്റാന്‍ഡ് അപ്പ് കൊമേഡിയന്‍ പ്രണിത്, ഖുശിക്കും ഇബ്രാഹിമിനുമെതിരെ നടത്തിയ പരിഹാസം വലിയ ശ്രദ്ധയാണ് നേടുന്നത്. സെയ്​ഫ് അലി ഖാനെ കുത്തിയവര്‍ക്ക് ശിക്ഷയായി മകന്‍റെ ചിത്രം കാണിക്കണം എന്നാണ് പ്രണിത് പറഞ്ഞത്. 

'മോശം പ്രകടനം കാഴ്​ചവക്കുന്നതില്‍ ഖുശി കപൂറിന് നല്ല സ്ഥിരതയുണ്ട്. ഖുശിയുടെ അവസാനത്തെ ചിത്രം ആമിര്‍ ഖാന്‍റെ മകന്‍ ജുനൈദ് ഖാനൊപ്പമായിരുന്നു. അതോടെ ഖുശിയുടെ ഇമേജ് തകര്‍ത്തു. ഇപ്പോള്‍ സെയ്​ഫ് അലി ഖാന്‍ മകന്‍ ഇബ്രാഹിം അലി ഖാനൊപ്പം അഭിനയിച്ചു, അതിലൂടെ ഇബ്രാഹിമിന്‍റെ ഇമേജും തകര്‍ന്നു.

 സെയ്ഫ് അലി ഖാനെ കുത്തി അക്രമിയോട് ജഡ്​ജി പറഞ്ഞത്, നിങ്ങളെ തൂക്കിക്കൊല്ലില്ല, നദാനിയാന്‍ രണ്ട് തവണ കാണിക്കുമെന്നാണ്. എന്‍റെ കഴുത്ത് അറുത്തേക്കൂ എന്നാണ് അത് കേട്ട് പ്രതി പറഞ്ഞത്,' പ്രണിത് പറഞ്ഞു.