ആടിത്തിമിര്‍ത്ത് വാണി വിശ്വനാഥ്; ഒപ്പം ദില്‍ഷയും; 'ആളേ പാത്താ' ഗാനമെത്തി

ദിൽഷ പ്രസന്നയ്ക്ക് ഒപ്പം കലക്കന്‍ നൃത്തച്ചുവടുകളുമായി വാണി വിശ്വനാഥ്.  'ഒരു അന്വേഷണത്തിന്റെ തുടക്കം' എന്ന ചിത്രത്തിലെ ഗാനരംഗത്തിലാണ് ഇരുവരും ഒന്നിച്ചെത്തിയത്. 'ആളേ പാത്താ' എന്ന ഗാനത്തിന് സംഗീതം നല്‍കിയിരിക്കുന്നത് എം. ജയചന്ദ്രനാണ്. നാളുകള്‍ക്കിപ്പുറം പഴയ പ്രസരിപ്പോടെ ഇഷ്ടതാരത്തെ വീണ്ടും കണ്ട ആവേശത്തിലാണ് ആരാധകര്‍. വാണിയുടെയും ദില്‍ഷയുടെയും നൃത്തത്തെ പ്രശംസിച്ച് നിരവധി പേരാണ് രം​ഗത്ത് എത്തുന്നത്. 'ഒരു അന്വേഷണത്തിന്റെ തുടക്കം' എന്ന ചിത്രത്തില്‍ കേന്ദ്ര കഥാപാത്രത്തെ അവതരിപ്പിക്കുന്നത് ഷൈൻ ടോം ചാക്കോയാണ്.

എം എ നിഷാദ് ആണ്  'ഒരു അന്വേഷണത്തിന്റെ തുടക്കം' സംവിധാനം ചെയ്തിരിക്കുന്നത്. ബെൻസി പ്രൊഡക്ഷൻസിന്റെ ബാനറിൽ കെ വി അബ്ദുൽ നാസറാണ് ചിത്രം നിര്‍മിച്ചിരിക്കുന്നത്. ഗാനരചന പളനി ഭാരതിയും, ആളേ പാത്താ എന്ന ഗാനം ആലപിച്ചിരിക്കുന്നത് അഖില രവീന്ദ്രനുമാണ്. മുൻ പൊലീസ് ഉദ്യോ​ഗസ്ഥനായ പി എം കുഞ്ഞിമൊയ്തീന്റെ ഡയറിയിൽ കുറിച്ചിട്ട ഒരു കേസാണ് ചിത്രത്തിന് ആധാരം. സംവിധായകന്‍ എം എ നിഷാദിന്റെ പിതാവ് കൂടിയാണ് പി എം കുഞ്ഞിമൊയ്തീന്‍.

ഇൻവെസ്റ്റിഗേഷൻ ത്രില്ലറായി ഒരുങ്ങുന്ന ചിത്രത്തില്‍ വാണി വിശ്വനാഥ്, സമുദ്രകനി, മുകേഷ്, സുധീഷ്, ശിവദ, അശോകൻ, ബൈജു സന്തോഷ്‌, ദുർഗ കൃഷ്ണ, അനുമോൾ, മഞ്ജു പിള്ള, സ്വാസിക, ആഭിജ, പ്രശാന്ത് അലക്സാണ്ടർ, ജോണി ആന്റണി,  രമേശ്‌ പിഷാരടി, ഷഹീൻ സിദ്ദിഖ്, കോട്ടയം നസീർ, വിജയ് ബാബു, സുധീർ കരമന, ഇർഷാദ്, ജാഫർ ഇടുക്കി എന്നിങ്ങനെ വലിയൊരു താരനിര അണിനിരക്കുന്നുണ്ട്. ചിത്രം നവംബർ 8ന് തിയറ്ററുകളിലെത്തും.