വളര്‍ത്തു സിംഹം ആക്രമിച്ചു; യുവാക്കള്‍ക്ക് ഗുരുതര പരുക്ക്; വിഡിയോ

വീട്ടിൽ വളർത്തിയ സിംഹത്തിന്‍റെ ആക്രമണത്തില്‍ രണ്ടു സൗദി യുവാക്കള്‍ക്ക് ഗുരുതര പരുക്ക്. യുവാക്കളുടെ കൈ സിംഹം കടിച്ചുമുറിച്ചു. പെണ്‍സിംഹം യുവാവിനെ നിലത്ത് തള്ളിയിട്ട് കയ്യിൽ ആഞ്ഞുകടിക്കുകയായിരുന്നു.

ആക്രമണം കണ്ട് ഓടിയെത്തിയ കൂട്ടുകാർ  യുവാവിനെ രക്ഷിക്കാൻ ശ്രമിച്ചു. ഇതോടെ സിംഹം ഇവർക്കു നേരെ തിരിഞ്ഞു. ഒരാളുടെ കൈ സിംഹം വായിലാക്കി കടിച്ചുമുറിക്കാൻ ശ്രമിച്ചു. വലിയ വടികളും ഇരുമ്പ് ഊന്നുവടിയും അടക്കം കയ്യില്‍ കിട്ടിയതെല്ലാം ഉപയോഗിച്ച് സിംഹത്തെ അടിച്ചെങ്കിലും കടി വിട്ടില്ല. സിംഹത്തിന്‍റെ തലയിലും ദേഹത്തും തല്ലിയെങ്കിലും ഫലമുണ്ടായില്ല.

ഏറെ നേരത്തിനു ശേഷമാണ് സിംഹത്തിന്‍റെ വായില്‍ നിന്ന് യുവാവിന്‍റെ കൈ പുറത്തെടുത്തത്. പരുക്കേറ്റവരെ ആശുപത്രിയില്‍ പ്രവേശിപ്പിച്ചു. സിംഹം യുവാക്കളെ ആക്രമിക്കുന്നതിന്‍റെയും ഇവരെ സുഹൃത്തുക്കള്‍ രക്ഷിക്കാന്‍ ശ്രമിക്കുന്നതിന്‍റെയും സി.സി.ടി.വി ദൃശ്യങ്ങൾ പുറത്തുവന്നു.