പാത്രിരാത്രി കാക്കകളുടെ 'ഗ്യാങ് ക്ലാഷ്'; ഉറക്കം കെട്ട് നാട്ടുകാര്‍; ഒടുവില്‍ നടപടി

സാധാരണ മനുഷ്യന്‍ ഗാഢനിദ്രയിലായിരിക്കുന്ന സമയമാണ് രാത്രി 1.30. എന്നാല്‍ സിംഗപ്പൂരിലെ ബിഷന്‍ നഗരത്തിലുള്ള ആളുകള്‍ക്ക് ഇപ്പോള്‍ രാത്രി ഒന്നരക്ക് ഉറക്കം നഷ്​ടപ്പെട്ടിരിക്കുകയാണ്, അതും ഏതാനും കാക്കകള്‍ കാരണം. കേള്‍ക്കുമ്പോള്‍ വിശ്വസിക്കാന്‍ പാടായിരിക്കും. എന്നാല്‍ ഇത് വിശ്വസിച്ചേ തീരു. 

പ്രദേശത്ത് താമസിക്കുന്ന ഒലിവര്‍ വെങ് എന്ന യുവാവ് വിഡിയോ സഹിതമാണ് തങ്ങളുടെ ദുരനുഭവം ഫേസ്​ബുക്കില്‍ പങ്കുവച്ചിരിക്കുന്നത്. കംപ്ലെയ്​ന്‍റ് സിംഗപ്പൂര്‍ ഫേസ്​ബുക്ക് പേജിലൂടെയാണ് യുവാവ് വിഡിയോ പങ്കുവച്ചത്. ഫ്​ളാറ്റുകളുടെ നടുവിലുള്ള കൂറ്റന്‍ മരത്തിനുചുറ്റും കരഞ്ഞുകൊണ്ട് വട്ടമിട്ടുപറക്കുന്ന കാക്കകളുടെ വിഡിയോ ആണ് ഇയാള്‍ പങ്കുവച്ചിരിക്കുന്നത്, അതും രാത്രി ഒന്നരക്ക്. 200 ഓളം കാക്കകളാണ് ഫ്​ളാറ്റ് നിവാസികളുടെ ഉറക്കം കെടുത്തുന്നതെന്നും ഇയാള്‍ പറഞ്ഞു. കാക്കകളുടെ ഗ്യാങ് ക്ലാഷ് പോലെയാണ് തോന്നുന്നതെന്നും ഇയാള്‍ കുറിച്ചു. 

ബിഷനില്‍ കാക്ക ശല്യം ഒരു പുതിയ കാര്യമല്ല. വര്‍ഷങ്ങളായി ഇവിടുത്തുകാര്‍ ഇത് അനുഭവിക്കുന്നതാണ്. ഇത് പൊതുജനാരോഗ്യത്തേയും ജനജീവിതത്തേയും വരെ ബാധിക്കുന്ന പ്രശ്​നമായിരിക്കുകയാണ്. വൈകുന്നേരവും അതിരാവിലെയുമാണ് കാക്കകള്‍ ഉച്ചത്തില്‍ ശബ്​ദമുണ്ടാക്കുന്നത്. കാക്കകള്‍ ആക്രമിക്കുന്ന സംഭവങ്ങള്‍ വരെ ഇവിടെ റിപ്പോര്‍ട്ട് ചെയ്യപ്പെട്ടിട്ടുണ്ട്. 

പരാതികള്‍ വ്യാപകമായതോടെ അധികൃതര്‍ പരിഹാര മാര്‍ഗങ്ങള്‍ക്ക് ശ്രമിക്കുന്നുണ്ട്. കാക്കകളുടെ കൂട് നീക്കുകയാണ് ഇപ്പോള്‍ അധികൃതര്‍. കാക്കകള്‍ക്ക് ഭക്ഷണം കൊടുക്കരുതെന്നും ഭക്ഷണ സാധനങ്ങള്‍ പുറത്തേക്ക് വലിച്ചെറിയതെന്നും നിര്‍ദേശവും പുറപ്പെടുവിച്ചിരുന്നു.