സംസ്ഥാന സ്കൂള്‍ കായികമേളയില്‍ ദേവിക ബെന്നിന് ട്രിപ്പിള്‍ സ്വര്‍ണം. കോട്ടയം പൂഞ്ഞാര്‍ എസ്.എം.വി.എച്ച്.എസ്.എസിലെ വിദ്യാര്‍ഥിനിയാണ് ദേവിക. ക്രോസ് കണ്‍ട്രിയിലാണ് ഇന്നത്തെ സ്വര്‍ണനേട്ടം. 1500, 3000 മീറ്റര്‍ ഓട്ടത്തിനും ദേവിക സ്വര്‍ണം നേടിയിരുന്നു. കായികമേളയുടെ അവസാനദിവസമായ ഇന്ന് 24 ഫൈനലുകളുണ്ട്. 24 സ്വര്‍ണവുമായി 206 പോയിന്റോടെ ഒന്നാമതുള്ള പാലക്കാട്, വെല്ലുവിളികളില്ലാതെ ചാംപ്യന്‍പട്ടം നേടുമെന്നാണ് പ്രതീക്ഷ.
400 മീറ്റര്‍ റിലേ, 200മീറ്റര്‍ ഓട്ടം, ട്രിപ്പിള്‍ ജംപ് തുടങ്ങിയവയുടെ ഫൈനലുകളാണ് ഇന്ന് നടക്കുന്നത്. 74 ഇനങ്ങള്‍ പൂര്‍ത്തിയായപ്പോള്‍ 24 സ്വര്‍ണവുമായി 206 പോയിന്റോടെ ഒന്നാമതുള്ള പാലക്കാട്, വെല്ലുവിളികളില്ലാതെ ചാംപ്യന്‍പട്ടം നേടുമെന്നാണ് പ്രതീക്ഷ. ഇന്നലെ രണ്ടാം സ്ഥാനത്തേക്കെത്തിയ മലപ്പുറം 10 സ്വര്‍ണവുമായി 110 പോയിന്റോടെ നില മെച്ചപ്പെടുത്തിയിട്ടുണ്ട്. ആദ്യ രണ്ട് ദിനങ്ങളില്‍ രണ്ടാമതായിരുന്ന എറണാകുളം ആറാം സ്ഥാനത്തേക്ക് പിന്‍തള്ളപ്പെട്ടു. സ്കൂള്‍ വിഭാഗത്തില്‍ മലപ്പുറത്തിന്‍റെ ഐഡിയല്‍ ഇ.എച്ച്.എസ്.എസ് 53 പോയിന്റോടെ ഒന്നാമതാണ്. വൈകിട്ട് നാല് മുപ്പതിന് നടക്കുന്ന സമാപന സമ്മേളനം വിദ്യാഭ്യാസമന്ത്രി വി.ശിവന്‍കുട്ടി ഉദ്ഘാടനം ചെയ്യും.
school sports meet triple gold for devika ben
