സംസ്ഥാനത്ത് തീവ്ര മഴയ്ക്ക് സാധ്യത; അതീവ ജാഗ്രതപാലിക്കാന്‍ നിര്‍ദേശം
- India
- Published on Jul 04, 2023, 11:31 AM IST
സംസ്ഥാനത്ത് തീവ്ര മഴയ്ക്ക് സാധ്യതയെന്ന് മുന്നറിയിപ്പ്. ഇടുക്കിയിലും കണ്ണൂരും റെഡ് അലര്‍ട്. മറ്റ് 12 ജില്ലകളിലും ഒാറഞ്ച് അലര്‍ട് പ്രഖ്യാപിച്ചു. അതീവ ജാഗ്രതപാലിക്കാന്‍ കാലാവസ്ഥാ വകുപ്പിന്‍റെ നിര്‍ദേശം. മഴ ശക്തമായതോെട ആലപ്പുഴ ഹരിപ്പാടും കരുവാറ്റയിലും ദേശീയപാത നിര്‍മാണം നടക്കുന്ന ഇടങ്ങളില്‍ വീടുകളില്‍ വെള്ളം കയറി. ചേര്‍ത്തല നഗരത്തിന്റെ പലയിടങ്ങളിലും വെള്ളക്കെട്ട് രൂക്ഷമാണ്. കാളികുളത്ത് തെങ്ങ് വീണ് കട തകര്‍ന്നു. കണിച്ചുകുളങ്ങരയില്‍ വൈദ്യുതി ലൈനുകള്‍ക്ക് നാശമുണ്ടായി. തൃശൂര്‍ പെരിങ്ങാവില്‍ വന്‍മരം കടപുഴകി വീണ് ഷൊര്‍ണൂര്‍ റോഡില്‍ ഗതാഗതം തടസപ്പെട്ടു. വൈദ്യുതി പോസ്റ്റുകള്‍ താഴെ വീണു. എറണാകുളം മഞ്ഞുമ്മലില്‍ മരം കടപുഴകി റോഡില്‍ വീണു. ആര്‍‍ക്കും പരുക്കില്ല.
തിരുവനന്തപുരം മുതലപ്പൊഴിയില്‍ ശക്തമായ തിരയില്‍ വള്ളം മറിഞ്ഞു. മൂന്ന് തൊഴിലാളികളും നീന്തി രക്ഷപ്പെട്ടു. പത്തനംതിട്ടയില്‍ അരയാഞ്ഞിലിമണ്‍, കുറുമ്പന്‍മൂഴി കോസ്‌വേകള്‍ മുങ്ങി. കോട്ടാങ്ങലില്‍ കിണര്‍ ഇടിഞ്ഞുതാഴ്ന്നു. നിരണത്ത് ശക്തമായ കാറ്റില്‍ തെങ്ങ് വീണ് നിരണം സ്വദേശി ഷാജിയുടെ പശു ചത്തു . ജലനിരപ്പ് ഉയര്‍ന്നതിനെത്തുടര്‍ന്ന് മണിയാര്‍ അണക്കെട്ടിന്റെ രണ്ട് ഷട്ടറുകള്‍ 10 സെന്‍റീമീറ്റര്‍ വീതം ഉയര്‍ത്തി. കോട്ടയം വെച്ചൂര്‍ ഇടയാഴത്ത് വീട് ഇടിഞ്ഞു വീണു. കാസര്‍കോട്ട് വിദ്യാര്‍ഥി മരം വീണ് മരിച്ചതിനു പിന്നാലെ സ്കൂളുകളില്‍ അപകടാവസ്ഥയിലുള്ള മരങ്ങള്‍ മുറിക്കാന്‍ നടപടി തുടങ്ങി. കാസര്‍കോട് ജില്ലയുടെ മലയോര മേഖലയില്‍ യാത്രാ നിയന്ത്രണം ഏര്‍പ്പെടുത്തി. രാത്രി ഏഴു മുതല്‍ രാവിലെ ഏഴുവരെ യാത്ര ഒഴിവാക്കണമെന്ന് ജില്ലാ കലക്ടര്‍ ആവശ്യപ്പെട്ടു.
