നമ്മുടെ മതം അപകടത്തിലാണ് എന്ന് പറയുന്നവരോട് അത് ഞങ്ങള്‍ നോക്കിക്കോളാം എന്ന് തിരിച്ചു പറയണം എന്ന് ബോളിവുഡ് നടന്‍ റിതേഷ് ദേശ്മുഖ്. സഹോദരനും മഹാരാഷ്ട്രയിലെ ലാത്തൂരിലെ കോണ്‍ഗ്രസ് സ്ഥാനാര്‍ഥിയുമായ ധീരജ് ദേശ്മുഖിന് വേണ്ടി പ്രചാരണത്തിനെത്തിയപ്പോഴായിരുന്നു റിതേഷിന്റെ വാക്കുകള്‍.
നമ്മുടെ മതം അപകടത്തിലാണ് എന്ന് പറയുന്നവരോട് അത് ഞങ്ങള്‍ നോക്കിക്കോളാം, നിങ്ങള്‍ വികസനത്തെ കുറിച്ച് പറയൂ എന്ന് തിരിച്ച് പറയണം. മതം പറഞ്ഞ് വോട്ട് പിടിക്കുന്ന പാര്‍ട്ടി നാശത്തിന്റെ വക്കിലാണ്. അവര്‍ക്ക് പിടിച്ചുനില്‍ക്കണം എങ്കില്‍ മതം കൂടിയേ തീരു. മതം അപകടത്തിലാണ് എന്ന് പറയുന്നവരുടെ പാര്‍ട്ടിയാണ് ശരിക്കും അപകടത്തില്‍, റിതേഷ് പറയുന്നു.
കര്‍മമാണ് ധര്‍മം, അതാണ് മതം എന്ന് ഭഗവാന്‍ കൃഷ്ണന്‍ പറഞ്ഞിട്ടുണ്ട്. കര്‍മം വീഴ്ച കൂടാതെ ചെയ്യുന്നവര്‍ ധര്‍മവും അനുഷ്ഠിക്കുന്നുണ്ട്. മതത്തോട് അവര്‍ക്ക് സ്വാഭാവികമായ കൂറും ഉണ്ടായിരിക്കും. സ്വന്തം കര്‍മം ചെയ്യാത്തവര്‍ക്കാണ് മതം ആവശ്യമായി വരുന്നത് എന്നും റിതേഷ് പറഞ്ഞു.
സംസ്ഥാനത്തെ തൊഴിലില്ലായ്മ നിരക്ക് കുറയ്ക്കാന്‍ മഹാരാഷ്ട്ര സര്‍ക്കാര്‍ അടിയന്തരമായി ഇടപെടണം എന്നും കര്‍ഷകരുടെ പ്രശ്നങ്ങള്‍ അവഗണിക്കരുതെന്നും റിതേഷ് പറഞ്ഞു. ബിജെപി സ്ഥാനാര്‍ഥി രമേശ് ഖരാഡിനെതിരെയാണ് റിതേഷിന്റെ സഹോദരന്‍ ധീരഡ് മത്സരിക്കുന്നത്. 2019ല്‍ 1.21 ലക്ഷം വോട്ടുകളുടെ ഭൂരിപക്ഷത്തില്‍ ധീരജ് ജയിച്ചിരുന്നു.