മനോരമ ന്യൂസ് നാട്ടുസൂത്രം സീസണ്‍ 2 വിന്റെ വിജയികളെ ഇന്നറിയാം. തദ്ദേശസ്ഥാപനങ്ങള്‍ നടപ്പാക്കിയ മികച്ച പദ്ധതികളില്‍ നിന്ന് തിരഞ്ഞെടുക്കപ്പെട്ട നാല് ആശയങ്ങള്‍ക്ക് ഒരു ലക്ഷം രൂപ വീതം സമ്മാനമായി കിട്ടും. നാട്ടുസൂത്രം ഗ്രാന്‍ഡ് ഫിനാലെ രാത്രി ഏഴിന് മനോരമ ന്യൂസില്‍ കാണാം.
ആശയം കൊണ്ട് അതിശയിപ്പിച്ചവര്‍. പുതുമ കൊണ്ട് പ്രചോദിപ്പിച്ചവര്‍. കാര്യക്ഷമത കൊണ്ട് മികവു കൊയ്തവര്‍. ഇത്തരത്തില്‍ നാട്ടുസൂത്രം ഫൈനല്‍ റൗണ്ടിലെത്തിയ 15 തദ്ദേശ സ്ഥാപനങ്ങളില്‍ നിന്നാണ് അവസാന വിജയികളെ കണ്ടെത്തുന്നത്. പദ്ധതി വിവരങ്ങളും തദ്ദേശ സ്ഥാപന പ്രതിനിധികവ്‍ നേരിട്ട് നല്‍കിയ വിശദീകരണങ്ങളും കണക്കിലെടുത്താകും വിധിനിര്‍ണയം.
മുന്‍ ചീഫ് സെക്രട്ടറി ഡോ.വിവേണു, മുന്‍ എം.പി കെ.സുരേഷ് കുറുപ്പ്, എഴുത്തുകാരിയും അധ്യാപികയുമായ കെ.രേഖ എന്നിവരടങ്ങുന്ന വിദഗ്ധ ജൂറിയാണ് വിജയികളെ നിശ്ചയിക്കുന്നത്. റവന്യൂ മന്ത്രി കെ രാജന്‍ മുഖ്യാതിഥിയാകുന്ന ഫിനാലെയില്‍ നടന്‍ വിനയ് ഫോര്‍ട്ടിലും മലബാര്‍ ഗോള്‍ഡ് ആന്‍റ് ഡയമണ്ടും പങ്കെടുക്കും.
സ്കൂള്‍വിദ്യാര്‍ഥികള്‍ പങ്കുവച്ച വികസന ആശയങ്ങളില്‍ നിന്ന് തിരഞ്ഞെടുത്ത രണ്ടെണ്ണത്തിന് ഇരുപത്തയ്യായിരം രൂപയുടെ സമ്മാനവും നല്‍കും മലബാര്‍ ഗോള്‍ഡ് ആന്‍റ് ഡയമണ്ടാണ് ഈ ഉദ്യമത്തില്‍ മനോരമ ന്യൂസിനൊപ്പം കൈകോര്‍ക്കുന്നത്.
