ലൈംഗികാതിക്രമ പരാതി: നിര്‍മാതാവ് ലിസ്റ്റിന്‍ സ്റ്റീഫനെ ചോദ്യം ചെയ്യുന്നു

വനിതാ ചലച്ചിത്രനിര്‍മാതാവിന്‍റെ ലൈംഗികാതിക്രമ പരാതിയില്‍ നിര്‍മാതാവ് ലിസ്റ്റിന്‍ സ്റ്റീഫനെ പ്രത്യേക അന്വേഷണ സംഘം ചോദ്യം ചെയ്യുന്നു. കൊച്ചിയിലെ എസ്ഐടി ഓഫിസിലാണ് ചോദ്യം ചെയ്യല്‍. തര്‍ക്ക പരിഹാരത്തിനായി വനിതാ നിര്‍മാതാവിനെ വിളിച്ചു വരുത്തിയ ശേഷം അപമാനിച്ചുവെന്നാണ് ഫിലിം പ്രൊഡ്യൂസേഴ്സ് അസോസിയേഷന്‍ ഭാരവാഹികള്‍ക്കെതിരെ പരാതി ലഭിച്ചിരുന്നത്.  ഇതനുസരിച്ച് ആന്‍റോ ജോസഫും ലിസ്റ്റിന്‍ സ്റ്റീഫനുമടക്കം ഒന്‍പതുപേര്‍ക്കെതിരെയാണ് സെന്‍ട്രല്‍ പൊലീസ് എഫ്ഐആര്‍ റജിസ്റ്റര്‍ ചെയ്തിരുന്നത്. ഇത് പിന്നീട് പ്രത്യേക അന്വേഷണ സംഘത്തിന് കൈമാറുകയായിരുന്നു. 

പരാതിക്കാരി നിര്‍മിച്ച സിനിമയുമായി ബന്ധപ്പെട്ട് ഉടലെടുത്ത തര്‍ക്കത്തില്‍ അസോസിയേഷന് പരാതി നല്‍കിയിരുന്നു. ഇത് ചര്‍ച്ച ചെയ്യുന്നതിനായി വിളിച്ചു വരുത്തിയപ്പോഴാണ് മോശം പെരുമാറ്റം ഉണ്ടായതെന്ന് അവര്‍ പ്രത്യേക അന്വേഷണ സംഘത്തിന് മൊഴി നല്‍കിയിരുന്നു.