നിയമനം പൂര്‍ണമായി പിഎസ്സിക്ക് വിടാന്‍ സംസ്ഥാന മന്ത്രിസഭ തീരുമാനിച്ചിട്ടും പുല്ലുവില കല്‍പിച്ച് 31 പൊതുമേഖലാ സ്ഥാപനങ്ങള്‍. പ്രത്യേക ചട്ടം തയ്യാറാക്കാതെയാണ് ഇപ്പോഴും പിന്‍വാതില്‍ നിയമനങ്ങള്‍ ഈ സ്ഥാപനങ്ങള്‍ നടത്തുന്നത്. ഇതോടെ പെരുവഴിയിലായത് കഷ്ടപ്പെട്ട് പഠിച്ച് കമ്പനി,കോര്‍പറേഷന്‍ റാങ്ക് ലിസ്റ്റിലുള്ളവരാണ്. കേരള ഓട്ടോമൊബൈല്‍സ്, കേരള മെഡിക്കല്‍ സര്‍വീസ് കോര്‍പറേഷന്‍, കേരള അബ്കാരി വെല്‍ഫയര്‍ ബോര്‍ഡ് എന്നിങ്ങനെയുള്ള സ്ഥാപനങ്ങളാണ് പിന്‍വാതില്‍ നിയമനങ്ങള്‍ സജീവമായി നടത്തുന്നത്.
അതേസമയം, നിയമനങ്ങള്‍ പിഎസ്സിക്ക് വിടാന്‍ തീരുമാനിച്ചതല്ലാതെ കൈമാറിയോ എന്ന് സര്‍ക്കാര്‍ അന്വേഷിക്കാതെയും ഉറപ്പുവരുത്താതെയും ഇരിക്കുന്നതാണ് വെല്ലുവിളിയാകുന്നതെന്ന് ഉദ്യോഗാര്‍ഥികള്‍ പറയുന്നു. പ്രത്യേക ചട്ടം രൂപീകരിക്കാതെ ഒളിച്ചുകളി നടത്തുകയാണ് പൊതുമേഖലാ സ്ഥാപനങ്ങള്‍ ചെയ്യുന്നത്. നിയമനങ്ങള്‍ പിഎസ്സിക്ക് വിട്ടാല്‍ താല്‍കാലിക ജീവനക്കാര്‍ക്ക് പണിപോകുമെന്ന് കണ്ടാണ് ബോര്‍ഡ് ചെയര്‍മാന്‍മാരും ഇതിന് കൂട്ടുനില്‍ക്കുന്നത്.
10112 പേരാണ് സംസ്ഥാനത്തെ സംസ്ഥാനത്തെ പൊതുമേഖലാ സ്ഥാപനങ്ങളില്‍ അസിസ്റ്റന്‍റ്, ലാസ്റ്റ് ഗ്രേഡ് തസ്തികകള്‍ക്കായി പിഎസ്സിയുടെ റാങ്ക് ലിസ്റ്റിലുള്ളത്. 31 പൊതുമേഖലാ സ്ഥാപനങ്ങളും നിയമനം പിഎസ്സിക്കു വിട്ടാല്‍ ലിസ്റ്റിലുള്ള മുക്കാല്‍ ഭാഗം പേര്‍ക്കും ഇപ്പോള്‍ തന്നെ ജോലികിട്ടുമെന്നതാണ് വാസ്തവം.