'പഴയ ന്യൂസ് പേപ്പറുകൾ സർവ്വവും നഷ്ടപ്പെട്ട മനുഷ്യർക്കുള്ള മേൽക്കൂരകളാകും'

വയനാട് ദുരന്തത്തിന്റെ പശ്ചാത്തലത്തിൽ, യൂത്ത് കോൺഗ്രസ് സംസ്ഥാന കമ്മിറ്റി പ്രഖ്യാപിച്ച 30 വീടുകൾക്കായുള്ള ധനസമാഹരണത്തിന് ന്യൂസ് പേപ്പർ ചാലഞ്ച് നടത്തുമെന്ന് അധ്യക്ഷൻ രാഹുൽ മാങ്കൂട്ടത്തിൽ. നിങ്ങളുടെ വീടുകളിലേക്ക് യൂത്ത് കോൺഗ്രസ് പ്രവർത്തകർ വരുമ്പോൾ അവർക്ക് നിങ്ങൾ നൽകുന്ന പഴയ ന്യൂസ് പേപ്പറുകൾ ഉരുൾപൊട്ടലിൽ സർവ്വവും നഷ്ടപ്പെട്ട മനുഷ്യർക്കുള്ള മേൽക്കൂരകളായ് മാറുമെന്ന് അദ്ദേഹം ഫെയ്സ്ബുക്കിൽ കുറിച്ചു. ന്യൂസ് പേപ്പർ ചാലഞ്ച് വഴി ലഭിക്കുന്ന പണം വീടുകൾ നിർമ്മിക്കാനായി ഉപയോ​ഗിക്കും. 

രാഹുൽ മാങ്കൂട്ടത്തിലിന്റെ ഫെയ്സ്ബുക്ക് പോസ്റ്റിന്റെ പൂർണരൂപം 

ഈ ദുരന്തമുഖത്ത് കണ്ട കാഴ്ചകൾ, സേവനങ്ങൾ ചിന്തകളിൽ ഉൾവെളിച്ചം നൽകുന്നതാണ്. ഒരുമയുടെ സന്ദേശം പകരുന്നതാണ്. 

യൂത്ത് കോൺഗ്രസിന്റെയും മറ്റനേകം സംഘടനകളുടെയും കളക്ഷൻ സെന്ററുകളിൽ ലോകത്തിന്റെ വിവിധയിടങ്ങളിൽ നിന്നും വന്ന കാരുണ്യപ്രവാഹവും നമുക്ക് കാണാൻ കഴിയും.

മുലപ്പാൽ നൽകാൻ എന്റെ ഭാര്യ റെഡിയാണെന്ന് പറഞ്ഞ ഇടുക്കിയിലെ സജിന്റെ വാക്കുകൾ നാം കേട്ടതാണ്. ഈ ദുരന്തത്തെ മറികടക്കാൻ ചെറുകൈത്താങ്ങെങ്കിലുമാവാൻ ഓരോ മനുഷ്യരും നൽകിയ സഹായങ്ങളുടെ വാർത്തകൾ കഴിഞ്ഞ കുറച്ച് ദിവസങ്ങളായി ഈ നാട് കേട്ടു. 

യൂത്ത് കോൺഗ്രസ് സംസ്ഥാന കമ്മിറ്റി പ്രഖ്യാപിച്ച 30 വീടുകൾക്കായുള്ള ധനസമാഹരണത്തിന്റെ ഭാഗമായി ന്യൂസ് പേപ്പർ ചാലഞ്ച് നടത്തുകയാണ്. 

നിങ്ങളുടെ വീടുകളിലേക്ക് യൂത്ത് കോൺഗ്രസ് പ്രവർത്തകർ വരുമ്പോൾ അവർക്ക് നിങ്ങൾ നൽകുന്ന പഴയ ന്യൂസ് പേപ്പറുകൾ ഉരുൾപൊട്ടലിൽ സർവ്വവും നഷ്ടപ്പെട്ട മനുഷ്യർക്കുള്ള മേൽക്കൂരകളായ് മാറും, കണ്ണീർ മഴയിലൊരു അഭയമായത് മാറും.. 

ഈ ദുരന്തവും നമ്മൾ അതിജീവിക്കും.