Photo Credit; Facebook
ബിജെപി ഭരിക്കുന്ന പാലക്കാട് മുനിസിപ്പാലിറ്റിയിലെ റോഡുകളുടെ മോശം അവസ്ഥ വ്യക്തമാക്കി എസ്എഫ്ഐ സംസ്ഥാന സെക്രട്ടറി പിഎം ആർഷോ ഫെയ്സ്ബുക്കിലിട്ട പോസ്റ്റ് സൈബറിടത്ത് ചർച്ചയാകുന്നു. തീർത്തും മോശമായ റോഡിലൂടെ ഡിവൈഎഫ്ഐ സംസ്ഥാന പ്രസിഡന്‍റ് വി വസീഫും സെക്രട്ടറി വികെ സനോജും സ്കൂട്ടറിൽ സഞ്ചരിക്കുന്ന പോസ്റ്റ് വൈറലാവാൻ കാരണം ആർഷോയുടെ ഒരു പരാമർശമാണ്.
'ഇക്കാ റോഡിലെ കുഴിയടക്കമുള്ള പാലക്കാട്ടെ വികസന മുരടിപ്പ് മാധ്യമലോകമുൾപ്പെടെ ചർച്ച ചെയ്യാനിടയില്ലെന്നും എന്നാൽ ഹെൽമറ്റ് ഇല്ലാത്ത വികെ സനോജ് ചർച്ചയാകുമെന്നുമാണ്' അദ്ദേഹത്തിന്റെ പരിഹാസം. ഈ ദൃശ്യത്തില്‍ പിന്നിലിരിക്കുന്ന വികെ സനോജ് ഹെല്‍മറ്റ് ധരിക്കാതെയാണ് സഞ്ചരിക്കുന്നത്. പാലക്കാട്ടെ ബിജെപി നേതാക്കളുടെ കീശ വികസിച്ചുകൊണ്ടേയിരിക്കുന്നുവെന്നും അദ്ദേഹം ഫെയ്സ്ബുക്കിൽ കുറിച്ചു.
14 ജില്ലാ കേന്ദ്രങ്ങളെ താരതമ്യം ചെയ്യുമ്പോൾ അടിസ്ഥാന സൗകര്യങ്ങളിലും ടൗൺ എന്ന നിലയിലും ഏറ്റവും പുറകിൽ ആണ് പാലക്കാട് എന്ന പ്രതികരണവുമായി മുഹമ്മദലി പ്രതികരണവുമായെത്തി. 15 കൊല്ലമായി എല്ലായിടത്തും മാറ്റങ്ങൾ വന്നപ്പോൾ പാലക്കാട് മാത്രം മാറ്റമില്ലാത്ത അവസ്ഥയാണ്, ഈ അവസ്ഥക്ക് മാറ്റം വരേണ്ടതുണ്ടെന്നും അദ്ദേഹം വ്യക്തമാക്കുന്നു.
വി വസീഫും ഇതേ വിഡിയോ ഫെയ്സ്ബുക്കിൽ ഷെയർ ചെയ്തിട്ടുണ്ട്. അതിന് താഴെയും രസകരമായ നിരവധി കമന്‍റുകളാണ് പ്രത്യക്ഷപ്പെടുന്നത്. പക്ഷേ നിങ്ങളുടെ മുഖ്യമന്ത്രി ആർഎസ്എസുമായി ബന്ധം സ്ഥാപിച്ചിട്ടുണ്ടെന്നാണ് ഷിബുവിന്‍റെ ട്രോൾ കമന്റ്.
അപ്പോ ഈ പാലക്കാട് എന്ന് പറയുന്നത് കേരളത്തിൽ അല്ലേ സഖാവേ എന്നാണ് മറ്റൊരു കമന്റ്. ഇടതുപക്ഷം ഭരിക്കുന്ന കേരളത്തിലെ മറ്റ് റോഡുകൾ എല്ലാം സൂപ്പർ എന്നാണ് ജെഹ്ഫർ മുഹമ്മദിന്‍റെ പരിഹാസം.