ആലപ്പുഴയിലെ അപകടത്തിന് കാരണം ഹൈഡ്രോപ്ലെയിനിങ്?; മഴക്കാലത്ത് വാഹനം ഓടിക്കുമ്പോള്‍ ഈക്കാര്യങ്ങള്‍ അറിയണം
- Lifestyle
- Published on Dec 04, 2024, 07:58 AM IST
ആലപ്പുഴ കളർകോട് കെഎസ്ആർടിസി ബസും കാറും കൂട്ടിയിടിച്ച് 5 വിദ്യാർഥികള്‍ മരിച്ചതിന്‍റെ ഞെട്ടലിലാണ് കേരളം. ശക്തമായ മഴ, കാറില്‍ കയറാവുന്നതിലും അധികം ആളുകള്‍, വാഹനം ഓടിച്ച വ്യക്തിയുടെ പരിചയക്കുറവ്, വാഹനത്തിന്റെ കാലപ്പഴക്കം തുടങ്ങിയവയെല്ലാം ആ വിദ്യാര്‍ഥികളുടെ മരണത്തിന് കാരണമായിട്ടുണ്ട്. ബ്രേക്ക് പിടിച്ചിട്ടും നിയന്ത്രണം വിട്ട കാര്‍, മഴ പെയ്ത് നനഞ്ഞ റോഡിൽ തെന്നി നീങ്ങുകയായിരുന്നു എന്ന് സിസിടിവികളില്‍ വ്യക്തമാണ്. ഹൈഡ്രോപ്ലെയിനിങ് എന്ന പ്രതിഭാസമാണ് ഇതിനു പിന്നില്‍. ഹൈഡ്രോപ്ളെയിനിങ് എന്ന ജലപാളീ പ്രവര്‍ത്തനമാണ് മഴക്കാലത്ത് വണ്ടികളുടെ ബാലന്‍സ് കളയുന്നത്. വാഹനം ഒടിക്കുമ്പോള്‍, പ്രത്യേകിച്ച് മഴക്കാലത്ത് വാഹനമോടിക്കുന്നവരെല്ലാം ശ്രദ്ധിക്കേണ്ട പ്രതിഭാസമാണ് ഹൈഡ്രോപ്ലെയിനിങ്.
Also Read: ‘ചേട്ടാ, രക്ഷിക്കണേ...’ വാവിട്ടുകരഞ്ഞ് കാറിലുണ്ടായിരുന്ന യുവാക്കള്‍; തീരാനൊമ്പരം
എന്താണ് ഹൈഡ്രോപ്ലെയിനിങ്?
മിനുസമുള്ള റോഡിൽ ജലത്തിന്റെ അളവ് കൂടുതലാകുന്ന സമയത്ത് ( മഴക്കാലത്ത് ) റോഡിനും ടയറിനുമിടയിലെ ഘർഷണം കുറഞ്ഞ് ഇല്ലാതാകും. ഈ അവസ്ഥയില്‍ നിയന്ത്രിക്കാൻ കഴിയാതെ വാഹനം തെന്നി നീങ്ങും. ഈ പ്രക്രിയയാണ് ഹൈഡ്രോപ്ലെയിനിങ് അല്ലെങ്കില്‍ അക്വാപ്ലെയിനിങ് എന്നൊക്കെ അറിയപ്പെടുന്നത്.
ലളിതമായി പറഞ്ഞാൽ മിനുസമുള്ള തറയില്‍ എണ്ണ ഒഴിച്ചാല്‍ നേരെ നടക്കാന്‍ പ്രയാസം അനുഭവിക്കുന്നതുപോലെയാണ് ഹൈഡ്രോപ്ലെയിനിങും. റോഡും ടയറുമായുള്ള സമ്പർക്കം വേർപെടുന്നതോടു കൂടി ബ്രേക്കിന്റെയും സ്റ്റിയറിങ്ങിന്റെയും ആക്സിലറേറ്ററിന്റെയും പ്രവർത്തനം സാദ്ധ്യമല്ലാതെ വരികയും വാഹനത്തിന്റെ നിയന്ത്രണം പൂർണമായും ഡ്രൈവർക്കു നഷ്ടമാകുകയും ചെയ്യും. അത് വാഹനം നിയന്ത്രണം നഷ്ടപ്പെട്ടു തെന്നി മറിയാൻ ഇടയാക്കും. മാത്രമല്ല ടയർ തേയ്മാനം മൂലം ടയറിന്റെ സ്പിൽവേയുടെ കനം കുറയുന്നതോടെ പമ്പിങ് കപ്പാസിറ്റി കുറയുന്നതും അക്വാപ്ലെയിനിങ്ങിനു കാരണമാകും.
ടയര്‍ ട്രെഡ് അഥവാ വെയര്‍ ആന്‍ഡ് ടിയര്‍ ഇന്‍ഡിക്കേറ്റിങ് ലൈനുകളില്‍ കുറവുണ്ടാകുമ്പോഴാണ് ഹൈഡ്രോപ്ലെയിനിങ് ഉണ്ടാകുന്നത്. മിനുസമുള്ള റോഡില്‍ ജലത്തിന്റെ അളവ് കൂടുമ്പോള്‍ വേഗത്തില്‍ സഞ്ചരിക്കുന്ന വാഹനങ്ങളുടെ ടയറിന്റെ പമ്പിങ് ഇഫക്ട് റോഡിനും ടയറിനുമിടയില്‍ വെള്ളത്തിന്റെ ഒരു പാളി രൂപപ്പെടുത്തുന്നു. ഇത് വാഹനത്തിന്റെ ടയര്‍ മുന്നിലേക്കും പിന്നിലേക്കും തെന്നിമാറാൻ കാരണമാകുന്നു.
അമിതവേഗത്തില്‍ വാഹനം ഓടിക്കുന്നത് ഹൈഡ്രോപ്ലെയിനിങ്ങ് വര്‍ധിപ്പിക്കും. ടയറിലെ ചില ത്രെഡ് ഡിസൈനുകളും ഹൈഡ്രോപ്ലെയിനിങ്ങിന് കാരണമാകുമെന്ന് കണ്ടെത്തിയിട്ടുണ്ട്.
ഹൈഡ്രോപ്ലെയിനിങ് എങ്ങനെ ഒഴിവാക്കാം?
- ടയറിൻ്റെ ഉപരിതല വിസ്തൃതി കൂടുന്നത് ഹൈഡ്രോപ്ലെയിനിങ് കുറയ്ക്കാൻ സഹായകമാണ്. വീതി കൂടിയ ടയറുകള്‍ ഉപയോഗിച്ചാല്‍ മഴക്കാലത്ത് റോഡില്‍ കൂടുതല്‍ പിടിത്തം ലഭിക്കാന്‍ സഹായകമാകും.
- മഴക്കാലത്ത്, റോഡില്‍ വെള്ളം ഉണ്ടാകാന്‍ സാധ്യതയുള്ള സമയങ്ങളില്‍, വെള്ളം ഒഴുകുകയോ കെട്ടിക്കിടക്കുകയോ ചെയ്യുന്ന റോഡുകളില്‍ വേഗം കുറച്ചു മാത്രം വാഹനം ഓടിക്കാന്‍ ശ്രദ്ധിക്കുക.
- മഴക്കാലത്ത് റോഡിലെ കുഴികളില്‍ വെള്ളം കെട്ടി നില്‍ക്കാനുള്ള സാധ്യത വളരെ കൂടുതലാണ്. വാഹനം ഓടിക്കുമ്പോള്‍ അത്തരം കുഴികള്‍ ശ്രദ്ധയില്‍പ്പെടണമെന്നില്ല. വെള്ളക്കെട്ട് ചെറുതായാലും അതിനു മുകളിലൂടെ വേഗത്തിൽ വാഹനം ഓടിക്കരുത്.
- വാഹനത്തിന്റെ ടയര്‍ പ്രഷര്‍ കൃത്യമാണെന്ന് എല്ലായ്പ്പോഴും ഉറപ്പുവരുത്തണം. എയര്‍ കൂടാനോ കുറയാനോ പാടില്ല. എയര്‍ പ്രഷര്‍ കൂടിയാലും ഹൈഡ്രോപ്ലെയിനിങ്ങിന് സാധ്യതയുണ്ട്.
- വാഹനം നിയന്ത്രണത്തില്‍ നില്‍ക്കുന്നില്ല എന്ന് തോന്നിയാലുടന്‍ ആക്സിലേറ്ററില്‍ നിന്ന് കാലെടുത്തിരിക്കണം. സഡന്‍ ബ്രേക്കിടുകയോ വെട്ടിത്തിരിക്കാനോാ പാടില്ല. വേഗം നിയന്തിക്കാന്‍ കഴിയുമെന്ന് മനസിലായാൽ ഇടവേളകളിട്ട് ബ്രേക്ക് ചെയ്ത് വാഹനം നിര്‍ത്താം.
വാഹനം ഓടിക്കുമ്പോള്‍ നമ്മുടെ ശ്രദ്ധയാണ് ഏറ്റവും പ്രധാനം. മഴക്കാലത്ത് പ്രത്യേകിച്ചും. വേഗത്തേക്കാള്‍ വലുത് ജീവനും ഉറ്റവരുമാണെന്ന് ഓരോ നിമിഷവും മനസിലോര്‍ക്കുക.
