പുലിപ്പേടിയില്‍ ഉള്ളൂരിലെ നാട്ടുകാർ; കൂട് സ്ഥാപിച്ച് വനംവകുപ്പ്

പുലിപ്പേടി ഒഴിയാതെ കണ്ണൂർ എരമം ഉള്ളൂരിലെ നാട്ടുകാർ. ദിവസങ്ങളായി തുടരുന്ന ഭീതിക്കിടെ വീണ്ടും പുലിയെ കണ്ടതോടെയാണ് ആശങ്ക ഇരട്ടിയായത്. പുലിയെ പിടികൂടാൻ വനംവകുപ്പ് ഒടുവിൽ കൂട് സ്ഥാപിച്ചു.

ഒറ്റക്കണ്ണിയിലെ ക്വാറിക്ക് സമീപത്താണ് അതിഥി തൊഴിലാളിയായ യുവാവ് പുലിയെ കണ്ടത്. നാട്ടുകാരെയും വനം വകുപ്പിനെയും വിവരം അറിയിച്ചു. പിന്നാലെയാണ് കാങ്കോൽ കടിങ്ങിനാംപൊയിലിൽ കൂട് വെച്ചത്.. നിരീക്ഷണ ക്യാമറ സ്ഥാപിക്കുകയും ചെയ്തിട്ടുണ്ട്. 

പുലിയെ വീണ്ടും കണ്ടതോടെ ആശങ്കയിലാണ് നാട്. കഴിഞ്ഞ ദിവസം പട്ടാപ്പകലാണ് കാങ്കോൽ ആലക്കാട്ടെ ശ്രീധരൻ്റെ വീട്ടിലെ വളർത്തുനായയെ പുലി ആക്രമിച്ചത്.. ശ്രീധരനും മകൾ ശ്രീലക്ഷ്മിയും ചേർന്ന് ആടിനെ മേക്കാൻ പോയപ്പോഴായിരുന്നു സംഭവം.