മലപ്പുറം വഴിക്കടവ് വനത്തിൽ കടുവയുടെ ആക്രമണത്തിൽ പിടിയാന ചരിഞ്ഞു. നെല്ലിക്കുത്ത് വനം സ്‌റ്റേഷനടുത്ത പുഞ്ചക്കൊല്ലി പ്ലാന്റേഷന് സമീപം പുന്നപ്പുഴയിലാണ് ആനയുടെ ജഡം കണ്ടത്.
15 വയസുള്ള പിടിയാനയുടെ ജഡമാണ് കണ്ടെത്തിയത്. ആനയുടെ തുമ്പിക്കൈയുടെ ഒരു ഭാഗം കടുവ തിന്ന നിലയിലാണ്. സമീപത്ത് കടുവയുടെ കാൽപ്പാടുകൾ കണ്ടതോടെയാണ് സംശയത്തിനിടയാക്കിയത്. പുഞ്ചക്കൊല്ലി വനമേഖലയിൽ കടുവയുടെ സാന്നിധ്യം നേരത്തെ സ്ഥരീകരിച്ചതാണ്. 2 മാസം മുൻപും ആനക്കുട്ടിയെ കടുവ ആക്രമിച്ച് കൊന്നിരുന്നു. വനപാലകർ സ്ഥലത്തെത്തുമ്പോൾ കടുവ ആനയുടെ ജഡത്തിൽ നിന്നു മാംസം തിന്നുകയായിരുന്നു. പ്രദേശത്തെ ജനവാസ മേഖലയിലേക്ക് കൂടി കടുവയെത്തുമെന്ന് ആശങ്കയിലാണ് ആദിവാസി കോളനികളും നാട്ടുകാരും. കടുവയെ പിടികൂടാൻ കൂട് സ്ഥാപിക്കണമെന്ന് ആവശ്യവും ഉയരുന്നുണ്ട്.