തിരുവനന്തപുരം മണ്ണന്തല മരുതൂരിൽ ഓട്ടോറിക്ഷ തോട്ടിലേക്ക് മറിഞ്ഞ് കാണാതായ ആളുടെ മൃതദേഹം കണ്ടെത്തി. കല്ലയം മാവുവിള സ്വദേശി വിജയന്റെ മൃതദേഹമാണ് കണ്ടെത്തിയത്. വെള്ളിയാഴ്ച വൈകിട്ട് മൂന്ന് മണിയോടെയായിരുന്നു അപകടം. ഓട്ടോ ഓടിച്ചിരുന്ന ആളെ ഇന്നലെ തന്നെ നാട്ടുകാര്‍ രക്ഷപെടുത്തിയിരുന്നു. അപകടസമയം തോട്ടില്‍ ഒഴുക്ക് കൂടുതലായതാണ് രക്ഷാപ്രവര്‍ത്തനത്തിന് തടസമായത്.
ഇന്നലെ വൈകിട്ട് കഴുനാടു നിന്ന് മരുതൂരിലേക്ക് വരികയായിരുന്ന ഓട്ടോറിക്ഷയാണ് നിയന്ത്രണം വിട്ട് തോട്ടിലേക്ക് മറിഞ്ഞത്. മരുതൂർ പാലത്തിന് സമീപം താഴെതോട്ടിലാണ് അപകടമുണ്ടായത്. അപകട സ്ഥലത്ത് നിന്നും മൂന്നര കിലോമീറ്റർ മാറി മലപ്പരിക്കോണം ക്ഷേത്രത്തിന് സമീപം തോട്ടിലാണ് ഇന്ന് രാവിലെ മൃതദേഹം കണ്ടെത്തിയത്. സമീപത്ത് ജോലിക്കായി എത്തിയ നാട്ടുകാരാണ് മൃതദേഹം ആദ്യം കണ്ടത്.
അപകട സമയം ഡ്രൈവര്‍ ഉള്‍പ്പടെ രണ്ടുപേരാണ് ഓട്ടോറിക്ഷയിൽ ഉണ്ടായിരുന്നത്. ഇതില്‍ ഡ്രൈവറായ കല്ലയം സ്വദേശി സുരേഷിനെ ഇന്നലെ തന്നെ നാട്ടുകാര്‍ രക്ഷപെടുത്തിയിരുന്നു. അപകടസമയം സംഭവസ്ഥലത്തെത്തിയ പൊലീസും ഫയർഫോഴ്സും ചേർന്ന് വിജയനായി തെരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് ഇന്ന് രാവിലെ തെരച്ചില്‍ നടക്കുന്നതിനിടെ മലപ്പരിക്കോണം ക്ഷേത്രത്തിന് സമീപം തോട്ടിലാണ് മൃതദേഹം കണ്ടെത്തിയത്.