ഐ.ഒ.എസ് 18 സോഫ്റ്റ് വെയർ റിലീസിനൊപ്പം ആക്ടിവേഷൻ ലോക്ക് ഫീച്ചർ എല്ലാ ഐഫോണുകളിലേക്കും വ്യാപിപ്പിക്കാനൊരുങ്ങി ആപ്പിൾ കമ്പനി. 9to5Mac-ൻ്റെ ഒരു റിപ്പോർട്ട് അനുസരിച്ച്, ഡെവലപ്പർമാർക്കും ബീറ്റാ ടെസ്റ്റർമാർക്കും ലഭ്യമായ ഈ അപ്ഡേറ്റ്, ബാറ്ററി, കാമറ, ഡിസ്‌പ്ലേ എന്നിവയെ യഥാർത്ഥ ഉടമയുടെ ആപ്പിൾ അക്കൗണ്ടുമായി ലിങ്ക് ചെയ്യും. അതോടെ ഐഫോണുകള്‍ മോഷ്ടിച്ച് ഘടകങ്ങളാക്കിയുള്ള വില്‍പനയ്ക്കും താഴുവീഴും.
ഐഫോണിൽ പുതിയ ഒരു ബാറ്ററിയോ ഡിസ്‌പ്ലേയോ ഘടിപ്പിക്കുമ്പോൾ , അതിന്റെ ഉടമസ്ഥാവകാശം ഉറപ്പാക്കുന്നതിനായി യഥാർത്ഥ ഉടമയുടെ ആപ്പിൾ അക്കൗണ്ട് പാസ്‌വേർഡ് ഉപഭോക്താവിനോട് ചോദിക്കും. ശരിയായ പാസ്‌വേർഡ് നൽകാതിരുന്നാൽ, അത് ഘടിപ്പിക്കുന്ന നിശ്ചിതഭാഗത്തിന്‍റെ പ്രവർത്തനം സ്തംഭിപ്പിക്കും. ഇത് മൂലം മോഷ്ടിക്കപ്പെട്ട ഭാഗങ്ങൾ ഉപയോഗിക്കുന്നതും വിൽക്കുന്നതും തടയാനാകും.
മോഷ്ടിച്ച ഐഫോണുകൾ ആക്ടിവേഷൻ ലോക്ക് ഫീച്ചർ കാരണം ഉപയോഗശൂന്യമായിത്തീരുന്നതുകൊണ്ട് ഭാഗങ്ങളായി വിറ്റഴിക്കപ്പെടുന്ന രീതിയാണ് നിലവിലുള്ളത്. ഐഫോണിന്‍റെ ഓരോ ഭാഗവും ആക്ടിവേഷൻ ലോക്ക് ചെയ്യുന്നത് വഴി ആപ്പിൾ ഐഫോൺ പാർട്സിന്‍റെ ഗ്രേ മാർക്കറ്റിന് തടയിടുന്നു. ആപ്പിൾ ഉപഭോക്താക്കളിൽ നിന്നുള്ള നിരന്തര അഭ്യർത്ഥനകളുടെ അടിസ്ഥാനത്തിലാണ് ഈ പുതിയ ഫീച്ചർ വികസിപ്പിച്ചതെന്ന് കമ്പനി വ്യക്തമാക്കി. ഇതോടെ ആപ്പിൾ ഫോണുകൾ മോഷ്ടിക്കപ്പെടുന്നതിന്‍റെ തോത് കുറക്കാനാകുമെന്നാണ് പ്രതീക്ഷ.
ഈ സംവിധാനത്തിന്‍റെ സഹായത്തോടെ സർവീസിങ്ങിനിടെ ആക്ടിവേഷൻ ലോക്കിൽ ഉള്ള ആപ്പിൾ അക്കൗണ്ടുമായി ബന്ധപ്പെട്ട ഒരു ഭാഗം ഉപകരണം വഴി കണ്ടെത്തി അതിന്റെ പ്രവർത്തനം ഉടൻ നിർത്തലാക്കാൻ സാധിക്കും.
ഐ.ഒ.എസ് 18-ൻ്റെ അന്തിമ പതിപ്പ് സെപ്റ്റംബർ 16-ന് പൊതുജനങ്ങൾക്ക് ലഭ്യമാകുമെന്നാണ് റിപ്പോർട്ടുകൾ. iPhone XRന് താഴെയുള്ള മോഡലുകളിൽ പുതിയ അപ്ഡേറ്റ് ലഭിക്കില്ല. ആക്ടിവേഷൻ ലോക്ക് സംവിധാനം iPhone മോഡലുകളിൽ മാത്രമേ ലഭിക്കുകയുള്ളൂ, iPadOS 18 ഉപയോഗിക്കുന്ന ഐപാഡുകൾക്ക് ഈ പുതിയ സംവിധാനം കിട്ടില്ല.