2.5 മില്യണിലേറെ സജീവ ഉപഭോക്താക്കളുണ്ടെങ്കിലും പ്രധാന എതിരാളികളായ ടെലിഗ്രാമും സിഗ്നലും വാട്സാപിന് സ്ഥിരം തലവേദനയാണ്. ഉപഭോക്താക്കള്‍ ആപ്പ് വിട്ട് പോകാതിരിക്കാന്‍ കിടിലന്‍ അപ്ഡേറ്റുകള്‍ കൊടുക്കുക എന്ന രീതിയാണ് മെറ്റ വാട്സാപിന്‍റെ കാര്യത്തില്‍ പ്രയോഗിച്ചുവരുന്നത്. ചിലപ്പോഴൊക്കെ അത് ഉപകാരപ്പെടുകയും ചെയ്യുന്നു.എതിരാളികള്‍ മനസില്‍പോലും വിചാരിക്കാത്ത ഫീച്ചറുകളാണ് വാട്സാപ് അടുത്തിടെ ഉപഭോക്താക്കള്‍ക്കായി പുറത്തിറക്കിയത്. കാമറ എഫക്റ്റുകളും, ഫില്‍റ്ററുകളും ഡോക്യുമെന്‍റ് സ്കാനറും അതില്‍ ചിലതുമാത്രം.ഇപ്പോഴിതാ വാട്സാപ് സ്റ്റാറ്റസുകള്‍ ഒരേ സമയം ഇന്‍സ്റ്റഗ്രാമിലും ഫേസ്ബുക്കിലും സ്റ്റോറികളായിക്കൂടി ഷെയര്‍ ചെയ്യാനുള്ള ഫീച്ചര്‍ പുറത്തിറക്കാനൊരുങ്ങുകയാണ് വാട്സാപ്. അക്കൗണ്ട് സെന്‍റര്‍ വഴിയാണ് ഇത് പ്രവര്‍ത്തിക്കുന്നത്.
ഉപഭോക്താക്കള്‍ക്ക് എളുപ്പത്തില്‍ അക്കൗണ്ട് സെന്‍റര്‍ വഴി വാട്സാപില്‍ എന്താണോ സ്റ്റാറ്റസ് ഇട്ടത് അത് ഫെയ്സ്ബുക്കിലും ഇന്‍സ്റ്റഗ്രാമിലും ഷെയര്‍ ചെയ്യാന്‍ കഴിയും.മുന്‍പ് ഓരോ സ്റ്റോറിയും പ്രത്യേകം പ്രത്യേകം ഇടണമായിരുന്നു. ഇനി മുതല്‍ ആ ബുദ്ധിമുട്ട് ഉണ്ടാകില്ല.അക്കൗണ്ടുകള്‍ തമ്മില്‍ ബന്ധിപ്പിക്കാന്‍ ഉപഭോക്താവിന് ആക്ടീവായ ഫേസ്ബുക്ക് അക്കൗണ്ടും ഇന്‍സ്റ്റഗ്രാം അക്കൗണ്ടും വേണമെന്ന് മാത്രം.സോഷ്യല്‍ മീഡിയ അക്കൗണ്ടുകള്‍ മെറ്റ അക്കൗണ്ട് സെന്‍ററിലേക്ക് നേരിട്ട് കണക്ട് ചെയ്യാന്‍ കഴിയും.ഉപഭോക്താക്കളുടെ ഇഷ്ടാനുസൃതം ഈ ഫീച്ചര്‍ ഉപയോഗപ്പെടുത്താം. ആവശ്യമെങ്കില്‍ ഓഫ് ചെയ്യാനും സാധിക്കും. ഇതിനായി വാട്സാപിലെ സെറ്റിങ്സിലെ അക്കൗണ്ട് സെന്‍റര്‍ എന്ന ഓപ്ഷന്‍ സെലക്ട് ചെയ്താല്‍ മതി.
ഉപഭോക്താക്കള്‍ക്ക് ഈ ഫീച്ചര്‍ ഇപ്പോള്‍ ഉപയോഗിക്കാനാവില്ല. ഉടന്‍ തന്നെ പുറത്തിറങ്ങുമെന്നാണ് റിപ്പോര്‍ട്ടുകള്‍.ഇതിനായി വാട്സാപ് അപ്ഡേറ്റഡാണോയെന്ന് പരിശോധിക്കുന്നത് നന്നായിരിക്കും.അതിനിടെ വാട്സാപ് സ്റ്റാറ്റസുകളില്‍ മ്യൂസിക് ചേര്‍ക്കാനുള്ള ഓപ്ഷന്‍ വാട്സാപ് പുറത്തിറക്കുമെന്ന് റിപ്പോര്‍ട്ടുകളുണ്ടായിരുന്നു. ഈ അപ്ഡേഷന്‍ വരുന്നതോടെ തേര്‍ഡ് പാര്‍ട്ടി ആപ്പുകളുടെ സഹായമില്ലാതെ തന്നെ ഉപഭോക്താക്കള്‍ക്ക് വാട്സാപില്‍ തന്നെ മ്യൂസിക് ബീറ്റോ പാട്ടോ ചേര്‍ക്കാന്‍ കഴിയും. ഫോട്ടോകളില്‍ 15 സെക്കന്‍റും വിഡിയോകളില്‍ ഒരു മിനിറ്റ് ദൈര്‍ഘ്യവുമുള്ള മ്യൂസിക് ബീറ്റുകള്‍ ഉപയോഗിക്കാം. ഇന്‍സ്റ്റഗ്രാമിന് സമാനമായി സ്റ്റാറ്റസ് കാണുന്നവര്‍ക്ക് സ്റ്റാറ്റസിനൊപ്പം ചേര്‍ക്കുന്ന ഗാനത്തിന്‍റെയും ആ ട്രാക്ക് വരുന്ന ആൽബത്തിന്റെയും പാടിയ വ്യക്തിയുടെയോ സംഗീത സംവിധായകന്റെയോ പേരും കാണാൻ സാധിക്കും. ഇതിൽ ടാപ്പ് ചെയ്താൽ വാട്സാപ്പില്‍ നിന്നുതന്നെ ഗാനം ഫീച്ചർ ചെയ്ത കലാകാരന്റെ ഇൻസ്റ്റാഗ്രാം പ്രൊഫൈലിലേക്ക് എത്താനും സാധിക്കും.