ദീപു വധത്തില്‍ മറ്റൊരാള്‍ക്ക് കൂടി പങ്കെന്ന് സൂചന; പ്രതിയുടെ കൂടുതല്‍ ദൃശ്യങ്ങള്‍ പുറത്ത്

കളിയിക്കാവിളയിലെ ക്വാറി ഉടമ ദീപു സോമന്റെ കൊലപാതകത്തില്‍ മറ്റൊരാള്‍ക്ക് കൂടി പങ്കെന്ന് സൂചന. കൊല നടത്തിയ ക്രിമിനല്‍സംഘാംഗം അമ്പിളിക്ക് ആയുധങ്ങളടക്കമുള്ള സഹായം എത്തിച്ച് നല്‍കിയ പാറശാല സ്വദേശി സുനിലിനായി തിരച്ചില്‍ തുടങ്ങി. കൊല്ലപ്പെടുന്ന സമയത്ത് ദീപുവിന്റെ ൈകവശമുണ്ടായിരുന്നതില്‍ ഏഴ് ലക്ഷം രൂപ അമ്പിളിയുടെ വീട്ടില്‍ നിന്ന് പൊലീസ് കണ്ടെടുത്തു. എന്നാല്‍ കൊലയുടെ കാരണത്തില്‍ ദുരൂഹത തുടരുകയാണ്.

കൊലപാതകവും ഗുണ്ടായിസവും ജയില്‍വാസവുമൊക്കെ സ്ഥിരംപണിയാക്കിയ അമ്പിളി, കളിയിക്കാവിള കൊലപാതകത്തില്‍ പിടിയിലായി ഒരു ദിവസം കഴിഞ്ഞിട്ടും പൊലീസിനെ വട്ടംകറക്കുകയാണ്. കുടുംബത്തിന് ഇന്‍ഷുറന്‍സ് തുക ലഭിക്കാന്‍ വേണ്ടി ദീപു തന്നെ പറഞ്ഞിട്ടാണ് ദീപുവിനെ കഴുത്തറുത്ത് കൊന്നതെന്ന വിചിത്രമൊഴിയാണ് അമ്പിളി ആവര്‍ത്തിക്കുന്നത്. കൂട്ടുപ്രതികളെ രക്ഷിക്കാനുള്ള നീക്കമാണ് ഈ മൊഴിക്ക് പിന്നിലെന്ന് വിലയിരുത്തി പൊലീസ് നടത്തിയ അന്വേഷണത്തിലാണ് പാറശാല സ്വദേശി സുനിലിന്റെ പങ്ക് വ്യക്തമായത്. നെയ്യാറ്റിന്‍കരയിലും പാറശാലയിലും സര്‍ജിക്കല്‍ ഷോപ്പ് നടത്തുന്ന സുനിലാണ് ദീപുവിനെ കൊല്ലാനുള്ള സര്‍ജിക്കല്‍ ബ്ളേഡും കൊലയ്ക്ക് ശേഷം മാറാനുള്ള വസ്ത്രവും അമ്പിളിക്ക് നല്‍കിയത്. കൊലയ്ക്ക് ശേഷം രക്ഷപെടാനായി കാറില്‍ കൂട്ടിക്കൊണ്ടുവരാമെന്നും സുനില്‍ പറഞ്ഞിരുന്നതായാണ് സൂചന. അതോടെ സുനില്‍ നല്‍കിയ ക്വട്ടേഷനാണോ കൊലപാതകമെന്നാണ് പൊലീസ് സംശയിക്കുന്നത്. സുനില്‍ ഒളിവിലാണ്.

കൊലപാതകം ആസൂത്രിതമെന്ന നിഗമനത്തിൽ പൊലീസ്. അതിനാല്‍ തന്നെ മൊഴികളിലെ വൈരുദ്ധ്യവും പോലീസിനെ വട്ടം ചുറ്റിക്കുകയാണ്. ദീപുവുമായുള്ള പരിചയം മുതലെടുത്താണ് കൊലപാതകം. അതുകൊണ്ട് അമ്പിളിക്ക് അപ്പുറം സുനിലിന് ദീപുവുമായി അടുപ്പമുണ്ടോയെന്നും പൊലീസ് അന്വേഷിക്കുന്നുണ്ട്.

കൊല്ലപ്പെടുന്ന സമയത്ത് ദീപുവിന്റെ കൈവശമുണ്ടായിരുന്ന പത്ത് ലക്ഷത്തില്‍ ഏഴ് ലക്ഷത്തോളം രൂപയാണ് അമ്പിളിയുടെ വീട്ടില്‍ നിന്ന് പൊലീസ് കണ്ടെടുത്തത്. ബാക്കി മൂന്ന് ലക്ഷം രൂപ എവിടേയെന്നതും ദുരൂഹമായി തുടരുകയാണ്. കൊലയ്ക്ക് ശേഷം വസ്ത്രം മാറി ടീഷര്‍ട്ടും പാന്‍സും ധരിച്ച് അമ്പിളി രക്ഷപെടുന്ന ചിത്രവും പൊലീസിന് ലഭിച്ചു. അതിനാല്‍ ഒന്നിലധികം പേരുടെ ആസൂത്രണമുള്ള ക്വട്ടേഷന്‍ കൊലപാതകമെന്ന നിഗമനത്തിലേക്കാണ് അന്വേഷണം നീളുന്നത്.

കളിയിക്കാവിള കൊലപാതക്കേസിലെ പ്രതിയുടെ കൂടുതല്‍ ദൃശ്യങ്ങള്‍ പുറത്ത്. കൊലപാതകത്തിന് ശേഷം പ്രതി അമ്പിളി മെഡിക്കല്‍ സ്റ്റോറിലാണ് എത്തിയത്. അവിടെവച്ച് ഫോണ്‍ വാങ്ങി വിളിച്ചു. വിളിച്ചത് പാറശാല സ്വദേശി സുനിലിനെയെന്ന് സംശയം. സിസിടിവി ദൃശ്യങ്ങള്‍ മനോരമ ന്യൂസിന് ലഭിച്ചു.

Kaliyikkavila deepu murder case accused cctv visuals