ഉറങ്ങി കിടന്ന ഭാര്യയെ തല നിലത്തടിച്ച് കൊലപ്പെടുത്തി; ഭര്‍ത്താവ് കീഴടങ്ങി

കാസർകോട് അമ്പലത്തറയിൽ ഭർത്താവ് ഭാര്യയെ കൊലപ്പെടുത്തിയ ശേഷം പൊലീസിൽ കീഴടങ്ങി. കണ്ണോത്ത് കക്കാട് ദാമോദരനാണ് ഭാര്യ ബീനയെ കൊലപ്പെടുത്തിയത്. കുടുംബ പ്രശ്നമാണ് കൊലപാതകത്തിന് കാരണമെന്നാണ് പൊലീസിന്റെ നിഗമനം. 

പുലർച്ച രണ്ടരയോടെയായിരുന്നു സംഭവം. ഉറങ്ങിക്കിടന്ന ബീനയെ ദാമോദരൻ കഴുത്തു ഞെരിച്ചും തല നിലത്തടിച്ചും കൊലപ്പെടുത്തുകയായിരുന്നു. ബീനയുടെ മരണം ഉറപ്പിച്ചതിന് ശേഷമാണ് ദാമോദരൻ രാവിലെ അമ്പലത്തറ പൊലീസ് സ്റ്റേഷനിൽ എത്തി കീഴടങ്ങിയത്. അതിനുമുൻപ് രാവിലെ കൊലപാതക വിവരം ഡൽഹിയിലുള്ള മകനെയും ബന്ധുവിനെയും വിളിച്ചറിയിച്ചു. 

കുടുംബ പ്രശ്നമാണ് കൊലപാതകത്തിലേക്ക് നയിച്ചതെന്നാണ് പൊലീസിന്റെ നിഗമനം. ബീനയും ദാമോദരനും തമ്മിൽ നിരന്തരം വഴക്കിടാറുണ്ടായിരുന്നെന്ന് നാട്ടുകാരും പറയുന്നു. ഇവരുടെ ഏക മകൻ വിശാൽ ഡൽഹിയിൽ മൊബൈൽ ടെക്നീഷ്യനാണ്.  പെരിയാരം മെഡിക്കൽ കോളജിൽ പോസ്റ്റുമോർട്ടം ചെയ്ത മൃതദേഹം ബന്ധുകൾക്ക് വിട്ടുകൊടുത്തു.