കൊച്ചി മട്ടാഞ്ചേരിയില്‍ വിദേശ വനിതകളെ ഉപദ്രവിക്കാന്‍ ശ്രമിച്ച യുവാക്കള്‍ പരാതി അന്വേഷിക്കാനെത്തിയ പൊലീസുകാരെ ആക്രമിച്ചു. ഇന്നലെ അര്‍ധരാത്രി മട്ടാഞ്ചേരി കല്‍വത്തി പാലത്തിന് സമീപമാണ് സംഭവം. നാട്ടുകാരില്‍ ചിലര്‍ അറിയിച്ചതിന്‍റെ അടിസ്ഥാനത്തിലാണ് മട്ടാഞ്ചേരി സ്റ്റേഷനിലെ സിപിഒ മാരായ സിബി, അരുണ്‍ ഭാസി എന്നിവര്‍ സ്ഥലതെത്തിയത്.
ഇരുവരെയും അസഭ്യം വിളിച്ച അക്രമിസംഘം പിന്നാലെ കല്ലുകള്‍ വാരി പൊലീസുകാര്‍ക്ക് നേരെയെറിഞ്ഞു. അക്രമി സംഘത്തിലെ മുഖ്യപ്രതിയെ ഇരുവരും പിടികൂടിയെങ്കിലും പ്രതിയുടെ മാതാപിതാക്കളും സഹോദരനും ചേര്‍ന്ന് ആക്രമിച്ചു. പൊലീസുകാരെ ആക്രമിച്ച ശേഷമാണ് പ്രതിയെ മോചിപ്പിച്ചത്. സംഭവത്തില്‍ പന്ത്രണ്ട് പേര്‍ക്കെതിരെ പൊലീസ് കേസെടുത്തു. ഒളിവില്‍ പോയ പ്രതികള്‍ക്കായി അന്വേഷണം പുരോഗമിക്കുകയാണ്.