ടിക് ടോകിലൂടെ താരമായി, ഒമര്‍ലുലു ചിത്രങ്ങളിലെ മുഖം; എംഡിഎംഎയുമായി പരീക്കുട്ടി പിടിയിലായപ്പോള്‍

മൂലമറ്റം എക്‌സൈസ് റേഞ്ച് ഉദ്യോഗസ്ഥര്‍ നടത്തിയ വാഹനപരിശോധനയിലാണ് കഞ്ചാവും എം.ഡി.എം.എ.യുമായി  സിനിമ-ബിഗ്‌ബോസ് താരം പരീക്കുട്ടിയും സുഹൃത്തും പിടിയിലായത്. കേസില്‍ ജിസ്മോനാണ് ഒന്നാം പ്രതി. ഇവരില്‍നിന്ന് 10.5 ഗ്രാം എം.ഡി.എം.എ.യും ഒന്‍പത് ഗ്രാം കഞ്ചാവും കണ്ടെത്തിയിരുന്നു.

Also Read : എം.ഡി.എം.എയും കഞ്ചാവുമായി സിനിമ താരം പരീക്കുട്ടിയും സുഹൃത്തും പിടിയില്‍

പരീക്കുട്ടി പെരുമ്പാവൂര്‍ എന്ന പേരിലാണ് നടനും ഗായകനുമായ പരീക്കുട്ടി സാമൂഹികമാധ്യമങ്ങളില്‍ അറിയപ്പെടുന്നത്. ടിക് ടോകില്‍ പാട്ടുകള്‍ പാടിയാണ് പരീക്കുട്ടി ശ്രദ്ധനേടിയത്. പിന്നീട് ഒമര്‍ലുലുവിന്റെ 'ഹാപ്പി വെഡ്ഡിങ്' എന്ന സിനിമയില്‍ ശ്രദ്ധിക്കപ്പെടുന്ന കഥാപാത്രത്തെ അവതരിപ്പിച്ചു. സിനിമ ഹിറ്റായതോടെ പരീക്കുട്ടി മുത്തലിബ് എന്ന കഥാപാത്രവും പ്രേക്ഷകമനസ്സുകളില്‍ ഇടംനേടി. ഒമര്‍ലുലുവിന്റെ തന്നെ മറ്റൊരു ചിത്രമായ 'അഡാര്‍ ലൗ'വിലും പരീക്കുട്ടി അഭിനയിച്ചിട്ടുണ്ട്. പട്ടിക്കാട് ഫിറോസ് എന്ന കഥാപാത്രത്തെയാണ് ഈ സിനിമയില്‍ പരീക്കുട്ടി അവതരിപ്പിച്ചത്.  ഇന്‍സ്റ്റഗ്രാമില്‍ 1.39 ലക്ഷം ഫോളോവേഴ്‌സുള്ള താരമാണ് പരീക്കുട്ടി പെരുമ്പാവൂര്‍.

ലഹരിമരുന്നുമായി നടന്‍ പരീക്കുട്ടിയും ജിസ്‌മോനും യാത്രചെയ്ത കാറില്‍ പിറ്റ്ബുള്‍ ഇനത്തിലുള്ള നായയും ഇതിന്റെ കുഞ്ഞും ഉണ്ടായിരുന്നു. പിറ്റ്ബുള്‍ നായ വാഹനത്തിലുണ്ടായിരുന്നതിനാല്‍ ഏറെ സാഹസികമായാണ് എക്‌സൈസ് സംഘത്തിന് ഇവരെ പിടികൂടാനായത്.