കൊല്ലം കരുനാഗപ്പള്ളിയില്‍ നിന്ന് കാണാതായ യുവതി കൊല്ലപ്പെട്ടതായി സംശയം. കരുനാഗപ്പള്ളി സ്വദേശിയായ വിജയലക്ഷ്മി(40)യെ കാണാതായതായി കഴിഞ്ഞ ദിവസം പൊലീസില്‍ പരാതി ലഭിച്ചിരുന്നു. എന്നാല്‍ യുവതിയുടെ മൊബൈല്‍ ഫോണ്‍ കഴിഞ്ഞ ദിവസം പ്രവര്‍ത്തിച്ചതോടെയാണ് സംശയം ബലപ്പെട്ടത്. സംഭവത്തില്‍ യുവതിയുമായി അടുപ്പമുണ്ടായിരുന്ന അമ്പലപ്പുഴ കരൂര്‍ സ്വദേശി ജയചന്ദ്രനെ പൊലീസ് കസ്റ്റഡിയിലെടുത്തു. യുവതിയെ കൊലപ്പെടുത്തി കരൂരില്‍ മറവ് ചെയ്തതായി ജയചന്ദ്രന്‍ പൊലീസിനോട് സമ്മതിച്ചതായാണ് സൂചന.
വിവാഹിതയായ വിജയലക്ഷ്മി ഭര്‍ത്താവില്‍ നിന്നകന്നാണ് കഴിഞ്ഞിരുന്നത്. യുവതിയെ കാണാനില്ലെന്ന പരാതി പൊലീസ് അന്വേഷിച്ച് വരുന്നതിനിടെയാണ് കൊച്ചിയിലെ കെഎസ്ആര്‍ടിസി ബസില്‍ നിന്ന് മൊബൈല്‍ഫോണ്‍ കളഞ്ഞുകിട്ടിയത്. കണ്ടക്ടര്‍ പൊലീസില്‍ കൈമാറിയ മൊബൈല്‍ ഫോണ്‍ വിജയലക്ഷ്മിയുടേതാണെന്ന് സ്ഥിരീകരിച്ചതോടെയാണ് വിജയലക്ഷ്മി കൊല്ലപ്പെട്ടിട്ടുണ്ടാകാമെന്ന സംശയം ഉടലെടുത്തത്. ജയചന്ദ്രന്‍റെ സ്വദേശമായ അമ്പലപ്പുഴയില്‍ വിജയലക്ഷ്മിയെത്തിയതിനും പൊലീസിന് തെളിവുകള്‍ ലഭിച്ചിട്ടുണ്ട്. ജയചന്ദ്രനെ അമ്പലപ്പുഴയിലെ കരൂരിലെത്തിച്ച് പൊലീസ് പരിശോധന നടത്തും.