മൂവാറ്റുപുഴ അമ്പലംപടിയിൽ ഭാര്യയെ കത്തികൊണ്ട് കുത്തികൊലപെടുത്താൻ ഭർത്താവിന്റെ ശ്രമം. മണിക്കൂറുകൾക്കുള്ളിൽ പ്രതി പൊലീസിന്റെ പിടിയിലായി. തൊടുപുഴ സ്വദേശി പാണവേലില്‍ മനോജ് കുഞ്ഞപ്പനെയാണ് മൂവാറ്റുപുഴ പൊലീസ് അറസ്റ്റ് ചെയ്തത്.
മദ്യലഹരിയിലാണ് മനോജ് ഭാര്യ സ്മിതയെ കത്തികൊണ്ട് കുത്തി കൊലപ്പെടുത്താന്‍ ശ്രമിച്ചത്. ആക്രമണത്തില്‍ സ്മിതയ്ക്ക് നെഞ്ചിനും കാലിനും ഗുരുതരമായി പരുക്കേറ്റു. ആക്രമണത്തെ തുടര്‍ന്ന് ഒളിവില്‍ പോയ പ്രതിയെ മണിക്കൂറുകള്‍ക്കുള്ളിലാണ് അന്വേഷണ സംഘം പിടികൂടിയത്. സ്മിതയെ അസഭ്യം പറഞ്ഞതിനും മര്‍ദിച്ചതിനും 2021 ല്‍ മുവാറ്റുപുഴ സ്റ്റേഷനില്‍ ഇയാള്‍ക്കെതിരെ കേസ് രജിസ്റ്റര്‍ ചെയ്തിട്ടുണ്ട്.
മദ്യപിച്ചുവന്ന് മനോജ് സ്ഥിരമായി വീട്ടിൽ വഴക്കുണ്ടാക്കാറുണ്ടെന്ന് നാട്ടുകാരും പറയുന്നു. കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു. സ്മിത കോട്ടയം മെഡിക്കല്‍ കോളേജില്‍ അത്യാഹിതവിഭാഗത്തില്‍ ചികിത്സയിലാണ്.