ട്രോളി ബാഗിലൊളിപ്പിച്ച് കടത്തിയ പത്ത് കിലോ കഞ്ചാവുമായി യുവാവ് അറസ്റ്റില്‍. തൃശൂര്‍ കൊടുങ്ങല്ലൂര്‍ സ്വദേശി നൗഫലിനെയാണ് ഒറ്റപ്പാലം എക്സൈസ് സംഘം പിടികൂടിയത്. എക്സൈസിന്റെ പതിവ് പരിശോധനയ്ക്കിടയിലായിരുന്നു സംഭവം.
യാത്രാവിവരം അന്വേഷിച്ച എക്സൈസിനോട് ദീര്‍ഘദൂരയാത്ര കഴിഞ്ഞുള്ള വരവെന്നായിരുന്നു യുവാവിന്‍റെ മറുപടി. ട്രോളി ബാഗ് ഉള്‍പ്പെടെ യുവാവിന്‍റെ കൈവശം രണ്ട് ബാഗുകളാണ് ഉണ്ടായിരുന്നത്. ബാഗില്‍ വസ്ത്രവും വീട്ടിലേക്കുള്ള സാധനങ്ങളുമെന്നായിരുന്നു പ്രതികരണം. ട്രോളി ബാഗ് തുറക്കാന്‍ ആവശ്യപ്പെട്ടതോടെ നൗഫല്‍ പരുങ്ങി. ഉദ്യോഗസ്ഥരുടെ നിര്‍ബന്ധത്തിന് വഴങ്ങി ബാഗ് തുറക്കുമ്പോള്‍ ട്രോളിയില്‍ കഞ്ചാവ് ശേഖരം.
ട്രോളിയില്‍ ഒതുങ്ങാത്തത് മറ്റൊരു ബാഗിലും ഒളിപ്പിച്ചിരുന്നു. പത്ത് കിലോഗ്രാം കഞ്ചാവാണ് കണ്ടെടുത്തത്. ഒഡീഷയില്‍ നിന്നും കഞ്ചാവ് വാങ്ങി എറണാകുളത്ത് എത്തിച്ച് വില്‍പ്പന നടത്തുകയായിരുന്നു നൗഫലിന്റെ ലക്ഷ്യമെന്ന് ഉദ്യോഗസ്ഥര്‍ അറിയിച്ചു. ഷൊര്‍ണൂരിലെ പരിശോധന ഭയന്നാണ് ഒറ്റപ്പാലത്ത് ട്രെയിനിറങ്ങി ബസ് മാര്‍ഗം തൃശൂരിലെത്താന്‍ ശ്രമിച്ചത്. യുവാവ് നേരത്തെയും സമാനമായ രീതിയില്‍ കഞ്ചാവ് എത്തിച്ചിട്ടുള്ളതായി എക്സൈസിന് വിവരം ലഭിച്ചുണ്ട്. ഇക്കാര്യം വിശദമായി പരിശോധിക്കുമെന്ന് എക്സൈസ് അധികൃതര്‍ അറിയിച്ചു.