ആദ്യം അമ്മ, ഇപ്പോള്‍ അച്ഛനും അച്ഛമ്മയും. അയല്‍വാസിയായ കൊലക്കേസ് പ്രതിയെ ഭയന്ന് ബന്ധുവീട്ടിലാക്കിയിരുന്ന ഈ പെണ്‍മക്കളെ തേടിയെത്തിയത് നടുക്കുന്ന വാര്‍ത്തയാണ്. ‘ഇനി ഞങ്ങള്‍ക്കാരുമില്ല, അനാഥരായി’ എന്നുപറഞ്ഞ് അലമുറയിട്ട് കരയുന്ന ഈ പെണ്‍കുട്ടികള്‍ക്കു മുന്നില്‍ പൊലീസും നോക്കുകുത്തിയാകുകയാണ്.
പല തവണ പരാതിപ്പെട്ടിട്ടും പൊലീസ് തിരിഞ്ഞുനോക്കിയില്ല എന്നാണ് കൊല്ലപ്പെട്ട സുധാകരന്‍റെ മക്കള്‍ അഖിലയും അതുല്യയും പറയുന്നത്. ‘ചെന്താമരയെ പെട്ടെന്ന് പിടിച്ചാല്‍ മതിയായിരുന്നു. പിടിച്ചിട്ട് കൊന്നാല്‍ മതിയായിരുന്നു. എങ്കിലേ ഞങ്ങള്‍ക്ക് സമാധാനം കിട്ടൂ’ എന്നാണ് ഇവര്‍ കണ്ണീരോടെ പറയുന്നത്. ‘ഇത്രയൊക്കെ നടന്നിട്ടും പൊലീസ് വിളിച്ചിട്ടില്ല. എത്ര പരാതി കൊടുത്തു... ഇവര്‍ പൊലീസുകാരാണോ’ എന്നും ഈ പെണ്‍കുട്ടികള്‍ ചോദിക്കുന്നു.
കൊലക്കേസ് പ്രതിയുടെ ജാമ്യം റദ്ദാക്കാതെ അയാള്‍ പറഞ്ഞതപ്പാടെ വിശ്വസിച്ച് തിരിച്ചയച്ച പൊലീസിനെതിരെ കടുത്ത അമര്‍ഷമാണ് ഇവര്‍ പ്രകടിപ്പിക്കുന്നത്. ‘എന്‍റെ അമ്മയെ കൊന്ന അയാളെ നാലു വര്‍ഷം ജയിലില്‍ കൊണ്ടുപോയി നന്നായി ഭക്ഷണം കൊടുത്ത് വിട്ടിയച്ചില്ലേ’ എന്നാണ് അഖില ചോദിക്കുന്നത്.
‘പരാതി കൊടുത്തപ്പോള്‍ അയാളെ രാവിലെ വിളിച്ചുകൊണ്ടുപോയി വൈകിട്ടു തിരിച്ചയച്ചു. ജയിലില്‍ നിന്ന് വന്ന ശേഷം എന്‍റെ അമ്മയെ കൊന്ന സമയത്തെ പോലെ അയാള്‍ വീട്ടില്‍ പതുങ്ങി ഇരിക്കുകയായിരുന്നു. റൂമില്‍ ഇരുന്ന് എല്ലാം നിരീക്ഷിക്കുകയായിരുന്നു. എന്‍റെ വീട്ടില്‍ ആരൊക്കെയാ വരുന്നത്, എപ്പോഴാണ് പോകുന്നത് എന്നെല്ലാം നോക്കിവച്ചു.’ എത്രയൊക്കെ പറഞ്ഞിട്ടും പൊലീസിന് മനസ്സിലായില്ലെന്നും അഖില പറഞ്ഞു.