ഭാര്യയ്ക്ക് രഹസ്യഫോണ്‍, ചാറ്റില്‍ ചങ്കായി കണ്ട സുഹൃത്ത്; വെട്ടികൊന്ന കത്തി കണ്ടെടുത്തു

പത്തനംതിട്ട കലഞ്ഞൂരില്‍ യുവാവ് ഭാര്യയേയും സുഹൃത്തിനേയും വെട്ടിക്കൊല്ലാന്‍ ഉപയോഗിച്ച വെട്ടുകത്തി കണ്ടെടുത്തു. തെളിവെടുപ്പിലാണ് ഒളിപ്പിച്ച വെട്ടുകത്തി കണ്ടെത്തിയത്. ഞായറാഴ്ച രാത്രിയാണ് പാടം സ്വദേശി ബൈജു ഭാര്യ വൈഷ്ണയേയും സുഹൃത്ത് വിഷ്ണുവിനേയും വെട്ടിക്കൊന്നത്. കൊലപാതകത്തിന് ശേഷം ബൈജു വെട്ടുകത്തി ഒളിപ്പിച്ചു പൊലീസിനു മുമ്പാകെ കീഴടങ്ങിയിരുന്നു.ഇന്നലെ പ്രതിയെ കസ്റ്റഡിയില്‍ വാങ്ങിയതോടെയാണ് രാവിലെ തെളിവെടുപ്പ് നടത്തിയത്. വിഷ്ണു വാടകയ്ക്ക് താമസിച്ചിരുന്ന വീട്ടിലായിരുന്നു കൊലപാതകം. ഇവിടുത്തെ വിറകിലാണ് കൊലപാതകശേഷം വെട്ടുകത്തി ഒളിപ്പിച്ചത്. 

വെട്ടുകത്തിയില്‍‌ നിന്ന് വൈഷ്ണയും മുടിയും ഇരുവരുടേയും രക്തക്കറയും ഫോറന്‍സിക് സംഘം കണ്ടെത്തി. ഞായര്‍ രാത്രി ബൈജുവും വിഷ്ണുവും ഒരുമിച്ചാണ് ജോലി കഴിഞ്ഞു വന്നത്. ഉറക്കത്തില്‍ നിന്നുണര്‍ന്നപ്പോള് ഭാര്യയുടെ രഹസ്യഫോണും അതിലെ സന്ദേശങ്ങള്‍ കണ്ടതുമാണ് കൊലപാതകത്തിന് കാരണം.രക്ഷപെട്ട് വിഷ്ണുവിന്‍റെ വീട്ടിലേക്ക് ഓടിക്കയറിയപ്പോഴാണ് ബൈജു ഇരുവരേയും വെട്ടിക്കൊന്നത്. അതേസമയം പ്രതി ബൈജു ഭാര്യ വൈഷ്ണയുടെ രഹസ്യഫോണ്‍ കണ്ടെത്തിയെന്നും വാട്സാപ്പ് ചാറ്റില്‍ വിഷ്ണുവുമായുള്ള അടുപ്പം വ്യക്തമായെന്നും മൊഴി നല്‍കി. ഫോണ്‍ പരിശോധിക്കുന്നത് കണ്ടതോടെ വൈഷ്ണ വിഷ്ണുവിന്റെ വീട്ടിലേക്ക് ഓടുകയായിരുന്നുവെന്നും മൊഴിയില്‍ പറയുന്നു. 

കൊല്ലപ്പെട്ട വിഷ്ണുവും പ്രതി ബൈജുവും രാത്രി ജോലി കഴിഞ്ഞ് എത്തിയത് ഒരുമിച്ചായിരുന്നു, ഇതിനു ശേഷമാണ് സംഭവം നടക്കുന്നത്.ഇടക്കിടെ ദമ്പതികള്‍ക്കിടയില്‍ പ്രശ്നങ്ങളും തര്‍ക്കങ്ങളും ഉണ്ടാവാറുള്ളതായി അയല്‍വാസികള്‍ പറയുന്നു. നേരത്തേ ബൈജുവിന്റെ മര്‍ദനത്തെത്തുടര്‍ന്ന് വൈഷ്ണ സ്വന്തം വീട്ടിലേക്ക് പോയ സംഭവങ്ങളും ഉണ്ടായിട്ടുണ്ട്.