മുഖം തിരിച്ച് വിനായകനും സുരാജും; 'തെക്ക് വടക്ക്' ഗെറ്റപ്പ് പുറത്ത്

വിനായകനും സുരാജ് വെഞ്ഞാറമൂടും പ്രഥാന കഥാപാത്രങ്ങളാവുന്ന 'തെക്ക് വടക്ക്' സിനിമയിലെ ഇരുവരുടെയും ഗെറ്റപ്പ് പുറത്തുവിട്ടു. ക്യാരക്ടര്‍ റിവീലിങ് ടീസറാണ് പുറത്തിറക്കിയിരിക്കുന്നത്. കഷണ്ടി കയറിയ തലയും പിരിച്ചുവെച്ച കൊമ്പന്‍ മീശയുമായി വിനായകനും നരച്ച താടിയും മുടിയുമായി സുരാജ് വെഞ്ഞാറമൂടും പരസ്പരം മുഖം തിരിഞ്ഞുനിൽക്കുന്നതാണ് വീഡിയോ. മധ്യവയസ്‌കരായ കഥാപാത്രങ്ങളാണ് ഇരുവരും.

എസ് ഹരീഷിന്റെ 'രാത്രി കാവല്‍' എന്ന കഥയെ ആസ്പദമാക്കിയായി ഒരുക്കുന്ന 'തെക്ക് വടക്ക്' പ്രേം ശങ്കറാണ് സംവിധാനം ചെയ്യുന്നത്. എസ് ഹരീഷിന്റേതാണ് രചന. അഞ്ജന തിയറ്റേഴ്‌സിന്റെയും വാര്‍സ് സ്റ്റുഡിയോസിന്റെയും ബാനറില്‍ അഞ്ജന ഫിലിപ്പും വി എ ശ്രീകുമാറും ചേർന്ന് ഒരുക്കുന്ന ചിത്രം പാലക്കാട് ചിത്രീകരണം പൂര്‍ത്തിയാക്കി.