കമല്‍ഹാസന്‍, ശങ്കര്‍ ആരാധകര്‍ മറക്കാന്‍ ആഗ്രഹിക്കുന്ന സിനിമ ഏതെന്ന് ചോദിച്ചാല്‍ ആദ്യം വരുന്ന ഉത്തരം ഇന്ത്യൻ 2 എന്നായിരിക്കും. ക്ലാസിക്കായ ഇന്ത്യന്‍ ചിത്രത്തിന്‍റെ രണ്ടാം ഭാഗം തീയറ്ററില്‍ വന്‍ ദുരന്തമായി മാറുകയായിരുന്നു. മുടക്ക് മുതല്‍ പോലും ചിത്രത്തിന് ലഭിച്ചില്ല , സംവിധായകന്‍ ഷങ്കര്‍ അടക്കം ചിത്രവുമായി സഹകരിച്ചവര്‍ ഏറ്റുവാങ്ങിയ ട്രോളിനും കണക്കില്ലായിരുന്നു. എന്നാല്‍ ഇപ്പോഴിതാ ഇന്ത്യൻ 2 നൊപ്പം ചിത്രീകരണം പൂര്‍ത്തിയാക്കിയ ഇന്ത്യൻ 3 റീഷൂട്ട് ചെയ്യാൻ ഷങ്കർ ഒരുങ്ങുന്നതായാണ് റിപ്പോർട്ടുകള്‍. ഒപ്പം പുതിയ കുറച്ച് രംഗങ്ങള്‍ കൂട്ടിച്ചേര്‍ക്കുകയും ചെയ്യും. കമൽ ഹാസനാണ് റീഷൂട്ട് ചെയ്യാമെന്ന് നിർദേശിച്ചത്. ഈ രംഗങ്ങൾ ചിത്രീകരിക്കുന്നതിന് ഇനിയും 100 കോടിയോളം രൂപ മുടക്കേണ്ടി വരുമെന്നാണ് വിവരം.
ഇന്ത്യൻ 2 അവസാനിക്കുന്നത് മൂന്നാംഭാഗത്തിന്‍റെ ടീസറോടെയാണ്. സ്വാതന്ത്ര്യസമര പോരാളിയായ സേനാപതിയുടെ പ്രീക്വൽ ആണ് ഇന്ത്യൻ 3. സ്വാതന്ത്ര്യത്തിനും മുമ്പുള്ള കാലഘട്ടമാണ് സിനിമയിൽ പറയുന്നത്. വീരശേഖരൻ എന്ന കഥാപാത്രമായി കമൽഹാസൻ എത്തുമ്പോൾ അമൃതവല്ലിയായി കാജൽ അഗർവാൾ എത്തുന്നു. നേരത്തെ നടി സുകന്യയാണ് ഇന്ത്യൻ ആദ്യഭാഗത്തിൽ അമൃതവല്ലിയെ അവതരിപ്പിച്ചത്. നാല്‍പതുകാരനായി കമൽഹാസൻ ഇന്ത്യൻ മൂന്നാം ഭാഗത്തിൽ എത്തുന്നു.ഇന്ത്യന്‍ 2വില്‍ സേനാപതിയെന്ന കഥാപാത്രമായി കമൽഹാസൻ വീണ്ടുമെത്തിയപ്പോൾ സിദ്ധാർത്ഥ്, എസ് ജെ സൂര്യ, രാകുൽ പ്രീത്, പ്രിയ ഭവാനി ശങ്കർ, ബോബി സിംഹ എന്നിവരായിരുന്നു മറ്റ് താരങ്ങൾ.