ധനുഷുമായുള്ള വിവാദങ്ങള്‍ കത്തിനില്‍ക്കെ പിറന്നാള്‍ ദിനത്തില്‍ പുതിയ ചിത്രത്തിന്‍റെ ടീസര്‍ പുറത്തിറക്കി നടി നയന്‍താര. രാക്കയീ എന്നാണ് ചിത്രത്തിന്‍റെ പേര്.
ഇന്‍സ്റ്റഗ്രാം അക്കൗണ്ടിലൂടെ പങ്കുവെച്ച ടീസറിന്‍റെ അടിക്കുറിപ്പ് ഇങ്ങനെയാണ് 'നീതി എന്നാൽ ഓർമ്മ മാത്രമുള്ള നാട്ടിൽ, അവിടെ ഒരു അമ്മ ജീവിച്ചിരുന്നു, അവളുടെ ലോകം തൻ്റെ കുഞ്ഞായിരുന്നു...എന്നാൽ മകളുടെ ജീവന് ഒരു രാക്ഷസൻ ഭീഷണി ആയപ്പോള്‍, അവൾ ഓടിപ്പോകുന്നില്ല... പതറുന്നില്ല...പകരം,അവൾ യുദ്ധം പ്രഖ്യാപിക്കുന്നു. '
അക്രമിക്കാന്‍ രാക്ഷസക്കൂട്ടം വീടുവളഞ്ഞപ്പോഴും ഒരു തരി പോലും കൂസാതെ നില്‍ക്കുന്ന നയന്‍താരയെയാണ് ടീസറില്‍ കാണാന്‍ സാധിക്കുന്നത്. കടും ചുവപ്പ് സാരിയുടുത്ത് അവള്‍ തന്‍റെ കുഞ്ഞിനെ രക്ഷിക്കാന്‍ ഓടിയെത്തുന്നവരെ നേരിടുന്നു. അസാമാന്യ മെയ് വഴക്കത്തോടുകൂടെ ആക്ഷന്‍ രംഗങ്ങള്‍ കൈകാര്യം ചെയ്യുന്ന നയന്‍താരയെ ടീസറില്‍ കാണാന്‍ സാധിക്കും. സെന്തില്‍ നല്ലസ്വാമി എഴുതി സംവിധാനം ചെയ്യുന്ന ചിത്രത്തിന്‍റെ സംഗീത സംവിധായകന്‍ ഗോവിന്ദ് വസന്തയാണ്.
അതിനിടെ നയന്‍താരയുടെ 'നയന്‍താര: ബിയോണ്ട് ദ ഫെയറി ടെയി'ല്‍ ഡോക്യുമെന്‍ററി ഇന്ന് നെറ്റ്ഫ്ലിക്സില്‍ റിലീസ് ചെയ്തു. ഡോക്യുമെന്‍റെറിയുമായി ബന്ധപ്പെട്ട വിഷയത്തില്‍ നടന്‍ ധനുഷിനെതിരെ രൂക്ഷ വിമര്‍ശനവുമായി നയന്‍താര രംഗത്തെത്തിയിരുന്നു. ഇതിനെ തുടര്‍ന്ന് നിരവധി താരങ്ങള്‍ നടിക്ക് പിന്തുണയുമായി എത്തി. നടിക്കെതിരെ സോഷ്യല്‍ മീഡിയയില്‍ ഹേറ്റ് കാംപയിനും പ്രത്യക്ഷപ്പെട്ടു. രാക്കയി ചിത്രത്തിന്‍റേതായി ഇന്നലെ പുറത്തിറങ്ങിയ പോസ്റ്ററും സോഷ്യല്‍മീഡിയയില്‍ ശ്രദ്ധ നേടിയിരുന്നു.