ലേഡി സൂപ്പര്‍ സ്റ്റാറിന്, നയന്‍സിന് ഇന്ന് 40–ാം ജന്‍മദിനം. സ്വന്തം ആര്‍ജവം കൊണ്ടും പ്രയത്നം കൊണ്ടും ബിഗ് സ്ക്രീനില്‍ തന്റേതായ സിംഹാസനം സ്വന്തമാക്കിയ താരം. വലിയ വിവാദങ്ങള്‍ക്കിടെയാണ് ഇക്കുറി നയന്‍താരയുടെ ജന്‍മദിനം.
ദളപതിയുടെ ഈ വാക്കുകള്‍ മതി എന്താണ് നയന്‍താരയെന്നറിയാന്‍. കോളിവുഡിലെ ആണ്‍കോയ്മയെ അതിജീവിച്ച് സൂപ്പര്‍ സ്റ്റാറായി മാറിയ താരം. നായിക വിചാരിച്ചാലും സിനിമ വിജയിപ്പിക്കാമെന്ന് തെളിയിച്ച നയന്‍സ്. നായകന്‍മാര്‍ക്കൊപ്പം പ്രതിഫലം വാങ്ങുന്ന സൂപ്പര്‍ നായിക.
മോഡലിങ്ങിലൂടെ തുടക്കം. മനസിനക്കരെ, വിസ്മയത്തുമ്പത്ത്, നാട്ടുരാജാവ് തുടങ്ങിയ മലയാളസിനിമകളിലൂടെ തന്നെ പ്രേക്ഷകരുടെ ഹൃദയം കീഴടക്കി. തലവര മാറ്റിയത് തമിഴകം. സൂപ്പര്‍ താരങ്ങള്‍ക്കൊപ്പം സ്ക്രീന്‍സ്പേസ്. കൈ നിറയെ റോളുകള്‍.
ഒരു സിനിമ പോലെ ട്വിസ്റ്റ് നിറഞ്ഞ ജീവിതമാണ് നയന്‍താരയുടേത്. ഉയര്‍ച്ചയില്‍ നിന്ന് താഴ്ച്ചയിലേക്ക്.. ഗോസിപ്പ്–പ്രതിഷേധം, പ്രണയബന്ധങ്ങള്‍ വിവാദങ്ങള്‍.. നയന്‍സിന്റെ പോസ്റ്ററുകള്‍ തമിഴ്നാട്ടില്‍ കീറിയെറിയപ്പെട്ടു. കരിയര്‍ തീര്‍ന്നെന്ന് എല്ലാവരും കരുതി. പിന്നെ കണ്ടത് ജീവിതത്തിലും ബോള്‍ഡായ നയന്‍സിനെ. തിരിച്ചുവന്നത് തെന്നിന്ത്യയുടെ സൂപ്പര്‍ സ്റ്റാറാകാന്‍. ഡോറ, ഇമൈക്ക നൊടികള്‍ , കൊലമാവ് കോകില, ഐറ... നായിക വിചാരിച്ചാലും സിനിമ വിജയിപ്പിക്കാമെന്ന് തെളിയിച്ച ഉദാഹരണങ്ങള്‍
ധനുഷിനെതിരെ തുറന്ന കത്തെഴുതിയത് രണ്ട് ദിവസം മുന്‍പാണ്. നയന്‍താര ബിയണ്‍ ദ് ഫെയറി ടെയില്‍ എന്ന ഡോക്യുമെന്ററിയില്‍ നാനും റൗഡി താന്‍ എന്ന ചിത്രത്തിന്റെ മൂന്ന് സെക്കന്‍ഡ് മാത്രമുള്ള അണിയറ ദൃശ്യം ഉള്‍പ്പെടുത്തിയതിന് 10 കോടി ആവശ്യപ്പെട്ട് ധനുഷ് വക്കീല്‍ നോട്ടിസ് അയച്ചു. ഇതോടെയാണ് നയന്‍താരയുടെ കത്ത് എത്തിയത്. വിവാദങ്ങള്‍ക്കിടെ ഇന്നെത്തുന്ന നയന്‍താരയെക്കുറിച്ചുള്ള ഈ ഡോക്യുമെന്ററിയിലെ വിശേഷങ്ങളറിയാന്‍ കാത്തിരിക്കുകയാണ് ആരാധകര്‍.