വരുണ്‍ ധവാനൊപ്പം തകര്‍ത്താടി കീര്‍ത്തി സുരേഷ്; ബേബി ജോണിലെ ആദ്യഗാനമെത്തി

ബോളിവുഡില്‍ അരങ്ങേറ്റം കുറിക്കുന്ന കീര്‍ത്തി സുരേഷിന്‍റെ ആദ്യചിത്രം ബേബി ജോണിലെ ഗാനം പുറത്തിറങ്ങി. ദളപതി വിജയ് നായകനായെത്തിയ സൂപ്പര്‍ഹിറ്റ് ചിത്രം തെരിയുടെ ഹിന്ദി റീമേക്കാണ് ബേബി ജോണ്‍. വരുണ്‍ ധവാൻ ചിത്രത്തില്‍ നായകനായെത്തുന്നത്. ചിത്രത്തിലെ ആദ്യഗാനം പുറത്തിറങ്ങി മണിക്കൂറുകള്‍ക്കകം തന്നെ ട്രെന്‍ഡിങ് ലിസ്റ്റില്‍ ഇടംപിടിച്ചു.

വരുണ്‍ ധവാനൊപ്പം ഗ്ലാമറസ് ലുക്കില്‍ നിറഞ്ഞാടുന്ന കീര്‍ത്തി സുരേഷിനെ വിഡിയോയില്‍ കാണാം. തെരിയില്‍ സാമന്ത ചെയ്ത കഥാപാത്രത്തെയാണ് ബേബി ജോണില്‍ കീര്‍ത്തി അവതരിപ്പിക്കുന്നത്. നെത്തിന്ത്യന്‍ സംഗീത സംവിധായകന്‍ തമന്‍ ആണ് ബേബി ജോണിലെ ഗാനം ഒരുക്കിയിരിക്കുന്നത്. 'നെയ്ന്‍ മട്ടാക്ക' എന്ന ഗാനമാലപിച്ചിരിക്കുന്നത്  ദിൽജിത് ദോസഞ്ജും ദീയും ചേര്‍ന്നാണ്.

രണ്ട് ദിവസം മുൻപ് പുറത്തിറങ്ങിയ ഈ ​ഗാനത്തിന്റെ പ്രമോ വീഡിയോയും ഏറെ ശ്രദ്ധനേടിയിരുന്നു. എ കാലീസ്വരനാണ് ബേബി ജോണ്‍ സംവിധാനം ചെയ്തിരിക്കുന്നത്. ബേബി ജോണിന്‍റെ ഒറിജിനല്‍ പതിപ്പായ തെരി സംവിധാനം ചെയ്തിരിക്കുന്നത് അറ്റ്ലിയാണ്. ഇതേ അറ്റ്ലി തന്നെയാണ് ബേബി ജോണിന്‍റെ നിര്‍മാണം. ജിയോ സ്റ്റുഡിയോസ്, സിനി 1 പ്ലസ് എന്നിവരും സഹ നിര്‍മ്മാതാക്കളാണ്. വരുണ്‍ ധവാന്‍ കീര്‍ത്തി സുരേഷ് എന്നിവര്‍ക്ക് പുറമേ വാമിഖ ഗബ്ബി, ജാക്കി ഷ്രോഫ്, സാക്കിര്‍ ഹുസൈൻ, രാജ്‍പാല്‍ യാദവ്, സാന്യ മല്‍ഹോത്ര എന്നിവരും ചിത്രത്തിൽ ഉണ്ട്. ബേബി ജോണ്‍ ക്രിസ്മസ് റിലീസായി പ്രേക്ഷകർക്ക് മുന്നിലെത്തും.