ശ്രദ്ധിക്കണം കുഞ്ഞുങ്ങളിലെ ക്ലബ് ഫൂട്ട് വൈകല്യം: ജനന സമയത്തുതന്നെ ചികിത്സ വേണം

ന​വ​ജാ​ത ശി​ശു​ക്ക​ളിൽ കണ്ടുവരുന്ന ക്ലബ് ഫൂട്ട് വൈകല്യത്തിന്റെ ചികിത്സ കുട്ടി ജനിച്ചയുടൻ തന്നെ ആരംഭിക്കണം. ജന്മനാ തന്നെ കാലുകൾക്ക് ഉണ്ടാകുന്ന വൈകല്യത്തെയാണ് ക്ലബ് ഫൂട്ട് എന്നുപറയുന്നത്. കുഞ്ഞുങ്ങളുടെ കാലിന്റെ പാദം ഉള്ളിലേക്ക് മടങ്ങിയിരിക്കുന്ന അവസ്ഥയാണിത്.  ശസ്ത്രക്രിയയൊന്നും കൂടാതെ തന്നെ ജന്മനായുള്ള ക്ലബ്ഫൂട്ട് ശരിയാക്കുന്ന ചികിത്സാരീതിയാണ് പോൺസെറ്റി മെത്തേഡ്. 1950കളിൽ യു.എസിലെ അയോവ യൂണിവേഴ്‌സിറ്റി ഹോസ്പിറ്റൽസ് ആൻഡ് ക്ലിനിക്‌സിലെ ഇഗ്നാസിയോ വി. പോൺസെറ്റിയാണ് ഈ ചികിത്സാരീതി വികസിപ്പിച്ചെടുത്തത്. 

പോൺസെറ്റി മെത്തേഡ് വേദനയില്ലാത്തതും ചെലവ് കുറഞ്ഞതുമായ ചികിത്സാരീതിയാണ്.  ക്ലബ് ഫൂട്ട് വൈകല്യം കണ്ടെത്തി ശെരിയായി ചികിത്സ നൽകിയില്ലെങ്കിൽ, കുട്ടികൾ വലുതായാൽ നടക്കുമ്പോൾ വൈകല്യമുണ്ടാകും. ജനന സമയത്തുതന്നെ കുരുന്നുകളുടെ കാലുകൾക്ക് വൈരൂപ്യമുണ്ടോ എന്നു നോക്കേണ്ടതുണ്ട്. അങ്ങനെ വല്ലതും ശ്രദ്ധയിൽപ്പെട്ടാൽ, അത് അപ്പോൾതന്നെ ഡോക്ടറെ അറിയിക്കണം. 

ഇ​ത്ത​രം കു​ഞ്ഞു​ങ്ങ​ളു​ടെ കാ​ലു​ക​ളു​ടെ മാം​സ​​പേ​ശി​ക​ൾ ചു​രു​ങ്ങി​യ നി​ല​യി​ലാ​വും കാണപ്പെടുക. ആ​ൺ​കു​ഞ്ഞു​ങ്ങ​ളിലാണ് ഈ രോ​ഗം കൂടുതൽ കണ്ടുവരുന്നത്. 

കേ​ര​ള​ത്തി​ൽ 43 ക്ലി​നി​ക്കു​ക​ൾ 

ക്ലബ് ഫൂട്ട് വൈകല്യം ബാധിച്ച കു​ഞ്ഞു​ങ്ങ​ൾ​ക്കാ​യി കേ​ര​ള​ത്തി​ൽ 43 ക്ലി​നി​ക്കു​ക​ൾ പ്രവർത്തിക്കുന്നുണ്ട്. ​ഗവ. മെ​ഡി​. കോ​ള​ജു​ക​ളി​ലും ജി​ല്ലാ-​താ​ലൂ​ക്ക് ആ​ശു​പ​ത്രി​ക​ളി​ലും ക്ല​ബ്ഫൂ​ട്ട് ക്ലി​നി​ക്കു​ക​ളുടെ സേവനവും സൗ​ജ​ന്യ ചി​കി​ത്സയും ലഭ്യമാണ്. ക്ലബ് ഫൂട്ട് വൈകല്യം ഭേദപ്പെടുത്താനായി, സ്വ​കാ​ര്യ​മേ​ഖ​ല​യി​ലെ ചി​കി​ത്സാ ചെ​ല​വ് വലുതാണ്.  

കാ​ൽ​വി​ര​ലു​ക​ൾ മു​ത​ൽ ഇ​ടു​പ്പു​വ​രെ പ്ലാ​സ്റ്റ​റി​ടു​കയാണ് രോ​ഗത്തിന്റെ പ്രാ​ഥ​മി​ക ചി​കി​ത്സ. കാ​ലി​ന്റെ പു​റ​കി​ലു​ള്ള വ​ള്ളി നീക്കം ചെയ്യുന്ന ‘ടീ​നോ​ട്ട​മി’ എ​ന്ന ശ​സ്ത്ര​ക്രി​യ​യാ​ണ് അ​ടു​ത്ത സ്റ്റേജ്. തു​ട​ർ​ന്ന് കു​ഞ്ഞി​നെ ‘ബ്രേ​സ്’ എ​ന്ന് വി​ളി​ക്കു​ന്ന ചെ​റി​യ ഷൂ ​ധ​രി​പ്പി​ക്കും. നാ​ലു​മു​ത​ൽ അ​ഞ്ചു​വ​ർ​ഷം വ​രെ ഈ ​ഷൂ കു​ഞ്ഞി​നെ ധ​രി​പ്പി​ക്കേണ്ടതുണ്ട്. ഈ ഷൂ ധരിച്ചാൽ കു​ഞ്ഞു​ങ്ങ​ൾ​ക്ക് സാ​ധാ​ര​ണപോലെ ഓ​ടാ​നും ന​ട​ക്കാ​നും സാധിക്കും.