ഇന്ന് ഭൂരിഭാഗം ആളുകളും അനുഭവിക്കുന്ന പ്രശ്നമാണ് സ്ട്രെസ് അഥവാ സമ്മര്‍ദം. വീടുകളിലും ജോലിസ്ഥലങ്ങളിലുമെല്ലാം പലതരത്തില്‍ സ്ട്രെസ് അനുഭവിക്കുന്നവരുണ്ട്. ദൈനംദിന ജീവിതത്തില്‍ ചില കാര്യങ്ങള്‍ ശ്രദ്ധിച്ചാല്‍ മാനസിക സമ്മര്‍ദം ഒരു പരിധി വരെ ഒഴിവാക്കാന്‍ കഴിയും. അതില്‍ പ്രധാനപ്പെട്ട ഒന്നാണ് ശ്വസന വ്യായാമങ്ങള്‍. ആഴത്തിലുള്ള ശ്വാസോച്ഛ്വാസം ശരീരത്തെ ശാന്തമാക്കും.
മാത്രമല്ല ഹൃദയമിടിപ്പ് നിയന്ത്രിക്കാനും, മനസിനെ ശാന്തമാക്കാനും ഇത് വഴ‍ി കഴിയും. ദിവസവും ശ്വസന വ്യായാമം ചെയ്യുന്നത് രക്തസമ്മർദ്ദം കുറയ്ക്കാൻ സഹായിക്കുമെന്ന് പഠനങ്ങളും സൂചിപ്പിക്കുന്നുണ്ട്. ബ്രീത്തിങ് എക്സസൈസ് സ്ഥിരമായി ചെയ്യുന്നത് ശ്വാസകോശത്തിന്‍റെ ആരോഗ്യം നിലനിര്‍ത്താനും സഹായകരമാണ്
തണുത്ത വെള്ളത്തില്‍ മുഖം കഴുന്നതും സമ്മര്‍ദം കുറയ്ക്കും. ഇത് കോര്‍ട്ടിസോളിനെ കുറക്കാനും ചർമ്മത്തിന് കൂടുതല്‍ ഉന്മേഷം നല്‍കാനും സഹായിക്കുന്നു.
പ്രോഗ്രസ്സീവ് മസില്‍ റിലാക്സേഷനും സമ്മര്‍ദം കുറയ്ക്കാനുള്ള മറ്റൊരു വഴിയാണ്. സാധാരണയായി ടെന്‍ഷന്‍ വരുംമ്പോള്‍ പേശികള്‍ മുറുകും എന്നാല്‍ ഇതിലൂടെ പേശികളെ തിരിച്ച് വിശ്രമാവസ്ഥയിലേക്ക് കൊണ്ടുവരാന്‍ കഴിയും.ഈ വ്യായാമം ദിവസവും ചെയ്യുന്നതും സമ്മര്‍ദം കുറയ്ക്കാനുള്ളൊരു വഴിയാണ്.
ചില സുഗന്ധങ്ങളും സ്ട്രെസ് കുറയ്ക്കുന്നതിന് ഒരു പരിധി വരെ സഹായകമാണ്. ലാവെന്റര്‍, പെപ്പര്‍മിന്റ് തുടങ്ങിയവയുടെ മണമോ അല്ലെങ്കില്‍ മനസിനിഷ്ടപ്പെടുന്ന സുഗന്ധമുള്ള മെഴുകുതിരികള്‍ കത്തിക്കുന്നതോ സമ്മര്‍ദത്തെ അകറ്റാം. കാരണം ഇവയെല്ലാം ഒരു ശാന്തമായ അന്തരീക്ഷം സൃഷ്ടിക്കാന്‍ സഹായകമാകും.
ചുറ്റുപാടിലേക്ക് അവബോധം സൃഷ്ടിക്കുക. ചുറ്റുമുള്ള കാഴ്ചകള്‍, എഴുത്തുകള്‍, സുഗന്ധങ്ങള്‍, രുചികള്‍ എന്നിവയിലേക്കെല്ലാം മനസിന്റെ ശ്രദ്ധ കേന്ദീകരിക്കുക. പിരിമുറുക്കങ്ങള്‍ ഒരു പരിധി വരെ കുറയാന്‍ ഇത്തരം പ്രവൃത്തികള്‍ സഹായകമാകും.