ലിസ് നിക്ഷേപ തട്ടിപ്പുകേസിൽ 10 വർഷത്തിന് ശേഷം വിചാരണ പുനരാരംഭിക്കുന്നു. തുടരന്വേഷണ റിപ്പോർട്ട് തള്ളണമെന്ന പ്രതികളുടെ ആവശ്യം ഹൈക്കോടതി നിരസിച്ചതോടെയാണ് വിചാരണ പുനരാരംഭിക്കുന്നത്. പത്തുമാസത്തിനികം വിചാരണ പൂർത്തിയാക്കാനാണ് ഹൈക്കോടതി ഉത്തരവ്.
ലിസ് നിക്ഷേപ തട്ടിപ്പ് കേസിൽ തുടരന്വേഷണ റിപ്പോർട്ട് തള്ളണമെന്നാവശ്യപ്പെട്ട് മാനേജിങ് ട്രസ്റ്റി പാലക്കൽ വീട്ടിൽ കുര്യാച്ചൻ ചാക്കോ അടക്കം 9 പ്രതികളാണ് 10 വർഷം മുൻപ് ഹൈക്കോടതിയെ സമീപിച്ചത്. കൊച്ചി നർക്കോട്ടിക് സെൽ അസി.കമ്മിഷണറായിരുന്ന പി.എം. ജോസഫ് സാജു സമർപ്പിച്ച തുടരന്വേഷണ റിപ്പോർട്ട് തള്ളണമെന്നായിരുന്നു പ്രതികളുടെ ആവശ്യം. ജോസഫ് സാജുവിന് അന്വേഷണം നടത്താൻ അധികാരമില്ലെന്നായിരുന്നു പ്രതികളുടെ വാദം. ഈ വാദം ജസ്റ്റിസ് ബെച്ചു കുര്യൻ തോമസ് തള്ളി. തുടരന്വേഷണ റിപ്പോർട്ട് അംഗീകരിച്ച കോടതി കേസിന്റെ വിചാരണ 10 മാസത്തിനകം പൂർത്തിയാക്കാൻ എറണാകുളം അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതിക്ക് നിർദേശം നൽകി.
ഇടപാടുകാരിൽനിന്ന് 447 കോടി രൂപ പിരിച്ച കേസിൽ ഒമ്പത് പ്രതികൾക്കെതിരെ 2012 ൽ പൊലീസ് കുറ്റപത്രം സമർപ്പിച്ചിരുന്നു. നേരത്തെ 7 പ്രതികളുണ്ടായിരുന്ന കേസിൽ തുടരന്വേഷത്തിന് ശേഷമാണ് രണ്ടുപേരെ കൂടി പ്രതിപ്പട്ടികയിൽ ഉൾപ്പെടുത്തിയത്. നിക്ഷേപിക്കുന്ന തുക കാലക്രമേണ ഇരട്ടിക്കുമെന്ന് ഇടപാടുകാരെ വിശ്വസിപ്പിച്ച് മണി ചെയിൻ മാതൃകയിലായിരുന്നു പ്രവർത്തനം. തങ്ങൾ നടത്തുന്ന സംവിധാനത്തിലൂടെ പണം തിരികെ നൽകാൻ കഴിയില്ലെന്ന ഉറപ്പുണ്ടായിട്ടും പ്രതികൾ പണം സ്വീകരിച്ച് വഞ്ചന നടത്തിയതായാണ് കുറ്റപത്രത്തിലെ ആരോപണം. തുടരന്വേഷണ റിപ്പോർട്ട് തള്ളണമെന്നാവശ്യപ്പെട്ട് പ്രതികൾ ഹൈക്കോടതിയെ സമീപിച്ചതോടെ കേസിന്റെ വിചാരണ നിർത്തിവച്ചു.
ആയിരക്കണക്കിന് പേരാണ് നിക്ഷേപത്തുക മടക്കി കിട്ടുന്നതിനായി നിയമനടപടികളുമായി ഇപ്പോഴും മുന്നോട്ടുപോകുന്നത്. 10 മാസത്തിനുള്ളിൽ വിചാരണ പൂർത്തിയാക്കണമെന്ന ഹൈക്കോടതി ഉത്തരവ് ഇവർക്ക് ഏറെ ആശ്വാസമാകും.
Liz investment fraud case: Trial resumes after 10 years