മക്കൾ ഇയക്കം ഭാരവാഹികളുമായി നടൻ വിജയ് കൂടിക്കാഴ്ച നടത്തി

രാഷ്ട്രീയ പ്രവേശന അഭ്യൂഹം ശക്തമായി തുടരുന്നതിനിടെ ആരാധക സംഘടനയായ വിജയ് മക്കൾ ഇയക്കം പ്രവർത്തകരുമായി കൂടിക്കാഴ്ച നടത്തി നടന്‍ വിജയ്.  ഓരോ നിയമസഭാ മണ്ഡലങ്ങളിലെയും ഭാരവാഹികളെ നേരിൽ കണ്ടാണ് യോഗം. മണ്ഡലം  ഭാരവാഹികളുമായുള്ള  കൂടിക്കാഴ്ച നാളെയും  തുടരും.

 

234 മണ്ഡലങ്ങളിലെ വിജയ് മക്കൾ ഈയകത്തിന്റെ  ഭാരവാഹികളുമായാണ് വിജയ് സംവദിയ്ക്കുന്നത്. ഇന്ന് 15 ജില്ലകളിൽ നിന്നുള്ള 115 ഭാരവാഹികളെയാണ് നേരിൽ കണ്ടത്. സിനിമയിൽ നിന്നും അവധിയെടുത്ത് 2026 തെരഞ്ഞെടുപ്പ് ലക്ഷ്യം വച്ച് വിജയ് രാഷ്ട്രീയത്തിലിറങ്ങുന്നുവെന്ന പ്രചാരണം ശക്തമാണ്. ഉന്നത വിജയം നേടിയ വിദ്യാർത്ഥികളെ നേരിൽകണ്ടതിന്  പിന്നാലെയാണ് നിയമസഭ മണ്ഡലങ്ങളുടെ അടിസ്ഥാനത്തിൽ ഭാരവാഹികളെ കാണാൻ വിജയ് തീരുമാനിച്ചത്.

 

സിനിമയിലും പുറത്തും കൃത്യമായി രാഷ്ട്രീയം പറയുന്ന വിജയ്‌യുടെ രാഷ്ട്രീയ പ്രവേശനത്തെ അനുകൂലിച്ചും പ്രതികൂലിച്ചും നിരവധി പേരാണ് രംഗത്തെത്തിയത്. മൂന്നാഴ്ച മുൻപ്, തമിഴ് നാട്ടിലെ 234 നിയമസഭാ മണ്ഡലങ്ങളിൽ നിന്നും  ഉന്നത വിജയം നേടിയ കുട്ടികളെ തെരഞ്ഞെടുത്ത് അവാർഡ് നൽകിയതോടെയാണ്  രാഷ്ട്രീയ പ്രവേശനം സജീവ ചർച്ചയായത്. പണം വാങ്ങി വോട്ടുചെയ്യരുതെന്ന വിജയുടെ ആഹ്വാനവും രാഷ്ട്രീയമായി വ്യാഖ്യാനിയ്ക്കപ്പെട്ടു. പനയൂരിലെ വസതിയിൽ നടക്കുന്ന കൂടികാഴ്ച നാളെയും തുടരും .

 

Vijay meets the members of his official fan club; speculations over the meeting arise