തെറ്റുപറ്റിയെന്ന് എഡിഎം നവീന്‍ ബാബു ഏറ്റുപറഞ്ഞെന്ന മൊഴിയില്‍ ഉറച്ച് കണ്ണൂര്‍ ജില്ലാ കലക്ടര്‍ അരുണ്‍ കെ. വിജയന്‍. അതേ സമയം കലക്ടറെ വിശ്വസിക്കാന്‍ പറ്റില്ലെന്ന് എഡിഎം നവീന്‍ ബാബുവിന്‍റെ ഭാര്യ മഞ്ജുഷ പറഞ്ഞു. പി.പി.ദിവ്യയുടെ ആക്ഷേപ പ്രസംഗം ചിത്രീകരിച്ച മാധ്യമത്തിനെതിരെ കേസ് വേണം എന്ന് സിപിഎം ജില്ലാ സെക്രട്ടറി ആവശ്യപ്പെട്ടു.
എഡിഎമ്മിന്‍റെ മരണത്തില്‍ പൊലീസ് അന്വേഷിച്ച് കാര്യങ്ങള്‍ കണ്ടെത്തട്ടേയെന്നാണ് കലക്ടര്‍ അരുണ്‍ കെ. വിജയന്‍ പറയുന്നത്. തെറ്റു പറ്റിയെന്ന് നവീന്‍ ബാബു പറഞ്ഞു എന്ന മൊഴിയില്‍ ഉറച്ചു നില്‍ക്കുന്നു. അന്വേഷണത്തില്‍ കാര്യങ്ങള്‍ പുറത്തുവരട്ടേ. തനിക്കെതിരായ നവീന്‍ ബാബുവിന്‍റെ കുടുംബത്തില്‍ ആരോപണങ്ങളില്‍ പ്രതികരിക്കാനില്ല.
കലക്ടറെ വിശ്വസിക്കാന്‍ കൊള്ളില്ലെന്നാണ് കുടുംബത്തിന്‍റെ ഉറച്ച നിലപാട്. ലീവ് പോലും ചോദിക്കാന്‍ മടിയായിരുന്നു. ഒട്ടും സൗഹൃദപരമല്ലായിരുന്നു ഇടപെടല്‍. ആക്ഷേപ പ്രസംഗത്തില്‍ തന്‍റെ ഭര്‍ത്താവ് തകര്‍ന്നിരിക്കുമ്പോള്‍ ചിരിയോടെയുള്ള കലക്ടറുടെ പെരുമാറ്റം സഹിക്കാനായില്ല. അതുകൊണ്ടാണ് സംസ്കാര ദിവസം കലക്ടറെ കാണാന്‍ വിസമ്മതിച്ചതെന്നു ം നവീന്‍ബാബുവിന്‍റെ ഭാര്യ മഞ്ജുഷ പറഞ്ഞു.
അന്വേഷണകാര്യങ്ങളില്‍ തല്‍ക്കാലം പ്രതികരിക്കാന്‍ ഇല്ലെന്നാണ് കുടുംബത്തിന്‍റെ നിലപാട്. അതേ സമയം പി.പി.ദിവ്യയുടെ പ്രസംഗം ചിത്രീകരിച്ചു പുറത്തുവിട്ട മാധ്യമത്തിനെതിരെയും നടപടി വേണമെന്നാണ് സിപിഎം പത്തനംതിട്ട ജില്ലാ സെക്രട്ടറി കെ.പി.ഉദഭാനുവിന്‍റെ നിലപാട്.
പി.പി.ദിവ്യക്കെതിരെ നടപടി വേണ്ടെന്ന് പാര്‍ട്ടി തീരുമാനിച്ചിട്ടില്ലെന്നും. കലക്ടറുടെ വീഴ്ച അന്വേഷിച്ച് നടപടി ഉണ്ടാവും എന്നും ഉദയഭാനു പറഞ്ഞു.