മണല്‍വാരല്‍ വാരുന്നതിനിടെ പൊലീസിനെ കണ്ട് പുഴയില്‍ ചാടി; യുവാവ് മരിച്ചു

കണ്ണൂരില്‍ മണല്‍ വാരുന്നതിനിടെ പൊലീസിനെ പേടിച്ച് പുഴയില്‍ ചാടിയ യുവാവിന്‍റെ മൃതദേഹം കണ്ടെത്തി. തളിപ്പറമ്പ് കുറ്റ്യേരി പുഴയില്‍ നിന്നാണ് തിരുവട്ടൂര്‍ സ്വദേശി ടി.കെ മെഹറൂഫിന്‍റെ മൃതദേഹം നാട്ടുകാര്‍ കണ്ടെത്തിയത്. ‍ഞായറാഴ്ച രാത്രിയില്‍ മണല്‍വാരല്‍ പരിശോധനക്കെത്തിയ പൊലീസ് സംഘത്തെ കണ്ട് മെഹറൂഫും കൂട്ടാളികളും പുഴയില്‍ ചാടിയിരുന്നു. മറ്റുള്ളവര്‍ തിരിച്ച് കരയ്ക്ക് കയറിയെങ്കിലും മെഹറൂഫിനെ കാണാതായി. മൃതദേഹം ആശുപത്രിയിലേക്ക് മാറ്റാനെത്തിയ പൊലീസിനെ നാട്ടുകാര്‍ തടഞ്ഞു. യുവാവിനെ കാണാനില്ലെന്ന് കാട്ടി മെഹറൂഫ് ഓടിച്ചിരുന്ന ലോറിയുടെ ഉടമ ഇന്നലെ പരാതി നല്‍കിയിട്ടും അന്വേഷിച്ചില്ലെന്നാണ് ആരോപണം.