സംസ്ഥാനത്ത് ബാറുകള്‍ക്ക് അഞ്ചു കിലോമീറ്റര്‍ പരിധിയില്‍ ഔട്ലറ്റുകള്‍ വേണ്ടെന്ന് ബാറുടമ അസോസിയേഷന്‍. ബവ്കോയ്ക്ക് നല്‍കിയ നിവേദനത്തിലാണു വാദം. ഔട്ലറ്റുകളില്‍ വില്‍ക്കുന്ന മദ്യത്തിന്‍റെ വിലകൂട്ടണമെന്നും ബാറുടമാ അസോസിയേഷന്‍.
ബാറുകളുടെ എണ്ണം റോക്കറ്റ് പോലെ കുതിച്ചുയരുന്നകാലത്ത് ഇതുവരെ തുടരുന്ന രീതി പറ്റില്ലെന്നാണ് ബാറുടമകളുടെ നിലപാട്. നഗരത്തില്‍ അഞ്ചു കിലോമീറ്ററിനുള്ളിലും പഞ്ചായത്തില്‍ പത്തു കിലോമീറ്ററിനുള്ളിലും ബാറുകള്‍ക്ക് സമീപത്ത് ഔട്ലറ്റ് അനുവദിക്കേണ്ടെന്നാണ് ബവ്കോയോട് ആവശ്യപ്പെടുന്നത്. നേരത്തെ സര്‍ക്കാരിനു മുന്നിലും ബവ്കോ ഇതേ ആവശ്യം ഉന്നയിച്ചിരുന്നു.
മദ്യത്തിനു മേല്‍ ഔട്ലറ്റ് ലാഭം കൂട്ടണമെന്നും ബാറുടമകള്‍ ആവശ്യപ്പെടുന്നു. നിലവില്‍ 20 ശതമാനം ലാഭമാണ് മദ്യം വില്‍ക്കുമ്പോള്‍ കിട്ടുന്നത്. അതു ഇരുപത്തിയഞ്ചോ മുപ്പതോ ശതമാനമാക്കി മാറ്റണം. ഇതു ഔട്ലറ്റുകളെ നന്നാക്കാനാണെന്നു തെറ്റിദ്ധരിക്കരുത്. ലാഭം കൂടുതലെടുത്താല്‍ മദ്യത്തിന്‍റെ വിലകൂടും. അങ്ങനെ വന്നാല്‍ ഔട്ലറ്റിനെ ഉപേക്ഷിച്ച് ആളുകള്‍ ബാറുകളിലേക്കെത്തും.
842 ബാറുകളാണ് നിലവിലുള്ളത്. ഇനിയും അന്‍പതോളം എണ്ണം ലൈസന്‍സ് കാത്ത് കിടപ്പുണ്ട്. ഇതോടെയാണ് ഔട്ലറ്റുകളെ പിടിക്കാന്‍ ബാറുകാര്‍ രംഗത്തെത്തിയത്. പൂട്ടിയ ഔട്ട്ലറ്റുകള്‍ തുറക്കാനായി ബവ്കോ ശ്രമിക്കുമ്പോള്‍ വലിയ പ്രതിഷേധമാണുണ്ടാകുന്നത്. ഇതിനു പിന്നില്‍ ബാറുകാരാണെന്ന ആക്ഷേപം ഉയരുന്നതിനിടെയാണ് ബാറിനടുത്ത് ഔട്്ലെറ്റ് വേണ്ടെന്ന നിവേദനവുമായി ബാറുടമകള്‍ തന്നെ ബവ്കോയെ സമീപിച്ചത്.