'ആ പെൺകുട്ടി ഈ വിഡിയോ കാണുന്നുണ്ടെങ്കിൽ ക്ഷമിക്കണം'; ബസിലെ ലൈംഗികാതിക്രമം പോസ്റ്റ് ചെയ്ത് യുവാവ്

ബസ് യാത്രക്കിടെ പ്രായപൂർത്തിയാവാത്ത 16 കാരിക്ക് നേരെ ലൈം​ഗികാതിക്രമം നടത്താൻ ശ്രമിക്കുന്ന യാത്രക്കാരന്റെ വിഡിയോ സോഷ്യൽ മീഡിയയിൽ പ്രചരിക്കുന്നു. ഇന്നലെ തിരുവനന്തപുരത്ത് നിന്ന് കളിക്കാവിളയ്ക്ക് പോവുകയായിരുന്ന കെഎസ്ആർടിസി ബസിലായിരുന്നു സംഭവം. ബസിലുണ്ടായിരുന്ന യുവാവ് ഇത് കാണുകയും അതിക്രമം നടത്തുന്നയാളുടെ ചേഷ്ഠകൾ അയാളറിയാതെ മൊബൈലിൽ ചിത്രീകരിക്കുകയുമായിരുന്നു. ശേഷം ആ വിഡിയോ വഴിപോക്കൻ എന്ന തന്റെ ഇൻസ്റ്റ​ഗ്രാം അക്കൗണ്ടിൽ പോസ്റ്റ് ചെയ്തു. 50 ലക്ഷം പേരാണ് ഈ വിഡിയോ കണ്ടത്.

പെൺകുട്ടിക്ക് നേരെ അതിക്രമം നടത്തിയയാളെ എഴുന്നേൽപ്പിച്ച് വിട്ടുവെന്നും ഈ പോസ്റ്റിൽ പറയുന്നു. ആ പെൺകുട്ടിയെ ബസിൽവെച്ച് എല്ലാവരും തിരിച്ചറിയും എന്നതുകൊണ്ടാണ് ബഹളമുണ്ടാക്കാത്തതെന്നും, ആ പെൺകുട്ടി ഈ വീഡിയോ കാണുന്നുണ്ട് എങ്കിൽ ക്ഷമിക്കണമെന്നും പോസ്റ്റിൽ വ്യക്തമാക്കുന്നു. ഇനി ആർക്കും ഇത്തരമൊരു അനുഭവം ഉണ്ടാകാതിരിക്കാനായാണ് അതിക്രമം നടത്തിയ ആളുടെ മുഖം വ്യക്തമാകുന്ന ഈ വിഡിയോ പോസ്റ്റ് ചെയ്തതെന്നും യുവാവ് കുറിക്കുന്നു. 

നെല്ലിമൂട് ഭാസ്കർ ന​ഗറിലുള്ള ആളാണ് ഈ വിഡിയോയിലുള്ളതെന്ന് പലരും പോസ്റ്റിന് താഴെ പറയുന്നുണ്ട്. സംഭവത്തിൽ പൊലീസ് കേസെടുത്തിട്ടുണ്ടോ എന്ന് വ്യക്തമല്ല.