കൊച്ചിയിൽ പൊലീസിന്റെ മിന്നൽ പരിശോധന; കഞ്ചാവുമായി നാല് യുവാക്കൾ പിടിയിൽ

കളമശേരി പോളിടെക്നിക് ഹോസ്റ്റലിലെ ലഹരിവേട്ടയ്ക്ക് പിന്നാലെ കുസാറ്റ് പരിസരത്തെ ഹോസ്റ്റലുകളില്‍ പൊലീസിന്‍റെ മിന്നല്‍ പരിശോധന. കഞ്ചാവുമായി നാല് യുവാക്കൾ പിടിയിലായി.  കളമശ്ശേരിയിൽ മൂന്നും തൃക്കാക്കരയിൽ ഒരാളുമാണ് പിടിയിലായത്.  കുസാറ്റ് പരിസരത്ത് നിന്നാണ് രണ്ടുപേരെ കസ്റ്റഡിയിലെടുത്തത് . രാത്രികാല പരിശോധനകളുടെ ഭാഗമായാണ് നേരത്തെ പരാതികള്‍ ഉയര്‍ന്ന ഹോസ്റ്റലുകളില്‍ പൊലീസ് സംഘം പരിശോധന നടത്തിയത്. 

മദ്യക്കുപ്പികള്‍ക്ക് പുറമെ കഞ്ചാവ് വലിക്കാന്‍ ഉപയോഗിക്കുന്ന കുപ്പിയടക്കം ഹോസ്റ്റലുകളില്‍ കണ്ടെത്തി. ലഹരിമരുന്ന് കൈവശം വെച്ച ഒരു വിദ്യാര്‍ഥിയെ കസ്റ്റഡിയിലെടുത്തു. മദ്യപിച്ച് വാഹനമോടിച്ച നിരവധി പേരും പിടിയിലായി. കളമശേരിയിലും വൈറ്റില ഹബിലും എസിപി മാരായ പി.വി. ബേബി, പി. രാജ്കുമാര്‍ എന്നിവരുടെ നേതൃത്വത്തിലായിരുന്നു പരിശോധന.