വേറിട്ട ഗ്രന്ഥശാലയൊരുക്കി ഡി.ബി. കോളജിലെ പൂർവ്വവിദ്യാർത്ഥി കൂടായ്മ

ഒരു കോളജ് തുടങ്ങിയ കാലം മുതലുള്ള വിദ്യാർഥികളുടേയും  അധ്യാപകരുടെയും മറ്റു ജീവനക്കാരുടെയും  സാഹിത്യ സൃഷ്ടികളുടെ ഗ്രന്ഥശാല തുറന്നിരിക്കുകയാണ് ഒരു പൂർവ്വവിദ്യാർത്ഥികൂട്ടായ്മ. വൈക്കം തലയോലപ്പറമ്പ് ഡി.ബി. കോളജിലെ പൂർവ്വ വിദ്യാർത്ഥി കൂട്ടായ്മയായ ഫോർ റണ്ണേഴ്സാണ് കോളജിലെ ഈ വേറിട്ട ഗ്രന്ഥശാലക്ക് പിന്നിൽ.

  പൂർവ്വവിദ്യാർത്ഥികളും   അദ്ധ്യാപകരും ജീവനക്കാരും ഒത്തൊരുമിച്ചപ്പോൾ തലയോലപറമ്പ് ഡി.ബി. കോളജിൽ ഒരു പുതിയ അനുഭവത്തിനാണ് തുടക്കമായത്. 1964 ൽ തുടങ്ങിയ തലയോലപ്പറമ്പ് ഡി.ബി. കോളജിന് പൂർവ്വ വിദ്യാർത്ഥികൾ നൽകുന്ന ഗ്രന്ഥ ദക്ഷിണയാണ് ഇത്. ലൈബ്രറി ഹാളിൽ തന്നെയാണ് പ്രത്യേകം സജ്ജീകരിച്ച പൂർവ്വവിദ്യാർത്ഥി കൂടായ്മയുടെ ഗ്രന്ഥശാല തുറന്നത്.  

പൂർവ്വവിദ്യാർത്ഥികളും അദ്ധ്യാപകരും ജീവനക്കാരുമായിരുന്ന 65 പേരുടെ  200 ലധികം രചനകളാണ്  ഈ ഗ്രന്ഥശാലയിലുള്ളത്... കഥ , ലേഖനം, കവിത, നോവൽ, ജീവചരിത്രം തുടങ്ങി എല്ലാ സാഹിത്യ മേഖലയിലുള്ള രചനകലും ഗ്രന്ഥാലയത്തിലുണ്ട്. പൂർവ്വ വിദ്യാർത്ഥികളായ രമേശ് പിഷാരടിയുടെയും  കേരള സാഹിത്യ അക്കാദമി അവാർഡ് ജേതാവ് എന്‍. അജയകുമാർ , മുൻ അദ്ധ്യാപിക എസ്. ശാരദക്കുട്ടി അങ്ങനെ ഗ്രന്ഥശാലയിലെ എഴുത്തുകാരുടെ പേരുകൾ നീളുന്നു..  കൂടുതൽ രചനകൾ സമാഹരിച്ച് ഗ്രന്ഥശാല വിപുലമാക്കാനാണ് ഫോർ റണ്ണേഴ്സിന്‍റെ ശ്രമം.