Image Credit; BCCI
തുടര്‍ച്ചയായി രണ്ട് ടി20 മത്സരങ്ങളില്‍ സെഞ്ചുറി അടിച്ചെടുത്തതോടെ സോഷ്യല്‍ മീഡിയയിലെവിടെയും സഞ്ജു മയം. ദക്ഷിണാഫ്രിക്കയ്ക്കെതിരായ ട്വന്‍റി 20 മല്‍സരത്തിലാണ് സഞ്ജു സാംസണ്‍ രണ്ടാം സെഞ്ചുറി നേടിയത്. തുടര്‍ച്ചയായ രണ്ട് ട്വന്‍റി 20യില്‍ സെഞ്ചുറിനേടുന്ന ആദ്യ ഇന്ത്യന്‍ താരമെന്ന റെക്കോര്‍ഡും സഞ്ജു നേടി.
വെറും 27 പന്തുകളില്‍ തന്നെ അര്‍ദ്ധ സെഞ്ചുറി നേടിയ സഞ്ജു 47 പന്തുകളില്‍ സെഞ്ചുറിനേട്ടത്തിലെത്തി. എണ്ണം പറഞ്ഞ 10 സിക്‌സറുകളും 7 ഫോറുകളും അടക്കമാണ് നേട്ടം. 107 റണ്‍സെടുത്ത് സഞ്ജു പുറത്തായി. സഞ്ജു അടിച്ചു കസറിയതോടെ സോഷ്യല്‍ മീഡിയയിലെവിടെയും സഞ്ജുവിന്‍റെ വിമര്‍ശകര്‍ക്കുള്ള ട്രോളുകളാണ്.
ഹേറ്റേഴ്സ് ഇനി എന്ത് ചെയ്യും മല്ലയ്യ, ഗവാസ്ക്കാറിന്റെ ബോധം പോയി എന്ന് പറയുന്നു, ആണോ?, അണ്ണനെന്ത് ആഫ്രിക്ക, ഹേറ്റേഴ്സ് അങ്ങോട്ട് മാറി നില്‍ക്ക് തുടങ്ങി വിമര്‍ശകരെ ലക്ഷ്യം വെച്ചാണ് കമന്‍റുകളില്‍ അധികവും.
ടി20 പരമ്പരയിലെ ആദ്യ മത്സരമാണ് ഡര്‍ബനിലെ കിംഗ്‌സമേഡ് സ്റ്റേഡിയത്തില്‍ നടക്കുന്നത്. ദക്ഷിണാഫ്രിക്കക്കെതിരെ ടോസ് നഷ്ടമായി ആദ്യം ബാറ്റ് ചെയ്യാനിറങ്ങുകയായിരുന്നു ഇന്ത്യ. പിന്നീട് കണ്ടത് സഞ്ജുവിന്‍റെ താണ്ഡവമായിരുന്നു.